Menm si in annan en rediksyon dan lakantite ka dife lannen pase konpare avek lannen 2002, nonm dife mete par ekspre in par kont ogmante.

Sa ti devwale par asistan sirentandan Brigad Tenny Dife, Msye André Morel, letan i ti pe fer en bilan bann dezas ki'n ganny rikorde lannen pase.

Msye Morel in tou-d-menm fer resorti ki, apard mete par ekspre, dife in osi okazyonnen par neglizans ensi ki par aksidan.

Dapre statistik, lannen 2003 in rikord 347 ka alert dirzans, 25 an-mwens ki lannen 2002.

Dan sa 347 ka, 111 ti pou lensidan dife, parmi 23 dife batiman, 20 dan transpor, 46 dife brousay, 7 dan bato e 10 pandan lenstalasyon elektrisite dan lakaz ek batiman.

Dapre bann sif, nonm dife batiman in redwir sorti 41 an 2002 pour vin 23 an 2003.

Apard bann lensidan dife, Brigad Tenny Dife in osi ede dan bann aksidan lo semen oubyen menm dan dezas natirel.

Zanvye ek Desanm i sa de mwan ki ti pli sarze avek bann tel lensidan dezas e 139 fwa bann zofisye ti ganny deplwaye pour ede.

Konpare avek lannen 2001 ek 2002 kot bann lensidan dife pli grav ti lo Praslin, an 2003 selman de ka dife ti raporte lo Praslin e enn lo La Digue.

Lamazorite ka dife grav ti ganny rikorde lo Mahe e sa i enkli sa bis SPTC ki ti ganny karbonize Belvedere an Out.

Bokou ava osi ankor mazin sa lensidan dife fatal an Oktob dan en lakaz Nageon Estate, Pointe Larue, ki ti pran lavi en pti fiy 10 an.

En fanmiy Baie Lazare ti osi perdi tou zot posesyon apre ki dife ti konpletman detri zot lakaz.

Estimasyon domaz okazyonnen par dezas an zeneral lannen pase i ariv preski lavaler 9.5 milyon roupi. Ladan, domaz okazyonnen par dife selman i en pti pe plis ki 6 milyon roupi, konpare avek 7.5 milyon roupi pour 2002.

Msye Morel ti osi fer remarke ki parey bann lannen avan, zot pe kontinyen avek zot travay prevansyon e osi amelyor kalite lantrennman bann zofisye dan domenn teknik debaz pour konbat dife.

Seksyon prevansyon dan Brigad Tenny Dife in osi enspekte sistenm prevansyon dan pilizyer batiman atraver pei e re-egzamin bann plan pour konstriksyon bann batiman pour donn lendikasyon lo bann landwra apropriye kot fodre enstal bann lekipman pour konbat dife batiman, parey bann fire extinguishers.

Malgre ki in annan en rediksyon dan lakantite ka dife ki'n raporte, asistan sirentandan Morel in tou-d-menm lans en lapel ek manm piblik pour vin pli pridan.

"Dimoun i devret pran plis prekosyon e zot devret evite kit zanfan tousel sirtou dan landrwa kot zot kapab ganny akse avek bann keksoz tel ki zalimet ek brike," Msye Morel ti dir.                   

Asistan sirentandan Morel ti osi dir ki i satisfe avek travay ki son seksyon in fer menm si zot in rankontre plizyer difikilte.

An sa ki konsern lekipman ek mendev, Msye Morel in dir ki sa i de fakter ki zot pe amelyore afen ki sa servis ki zot ofer i vin pli efikas.

I ti osi profite pour remersye manm piblik pour zot korperasyon letan bann lensidan dife i arive anvi ki plizyer fwa led ki manm piblik i ofer avan larive servis tenny dife i kapad redwir domaz.

LINKS