Litilite Korporasyon Piblik (PUC) i annan plan konmans en proze ki pou kout R517,000 pour fourni leo Copolia avek delo trete.

Detay sa proze ti ganny devwale par Minis pour Lanvironnman, Msye Ronny Jumeau, dan Lasanble Nasyonal Mardi le 20 Me, pandan sesyon demann kestyon.

Minis Jumeau ti pe reponn en kestyon demande par Manm Lasanble pour Plaisance, Onorab Ivy Edmond, lo progre proze delo dan leo Copolia vi logmantasyon popilasyon dan sa sou-distrik.

Minis ti eksplike ki sa proze, ki pou finanse par PUC, pou vwar konstriksyon en stasyon laponp, en basen ek lenstalasyon en laliny tiyo 2.2 kilomet. Proze pou konmanse osito ki PUC i ganny materyo e enn fwa konmanse i pou pran sis mwan pour konplete.

Swivan en lot kestyon lo distribisyon delo trete Dan Karno dan leo Pointe Au Sel, demande par Onorab Daisy Rath pour distrik Au Cap, minis ti fer resorti ki sa proze, ki enkli lenstalasyon laponp ek basen, pe ganny finalize.

Letan i ti pe reponn kestyon Manm Lasanble pour Anse Etoile, Onorab Anne Marie Mathiot, lo size distribisyon delo lo en baz regilye dan rezyon La Gogue ek La Retraite, minis ti anonse ki laponp ki pou ganny enstale pour fourni delo dan sa de landrwa pou arive dan pei ver lafen dimwan, e desito ki i arive i pou ganny enstale.

Minis ti osi donn leksplikasyon lo proze distribisyon delo Sid Mae ki i ti dir enn fwa konplete pou asire ki bann landrwa parey Anse Royale ki pa pe ganny delo trete pou gannyen. Sa proze pou vwar en koneksyon sistenm delo trete sorti Hermitage avek sistenm delo Was ek Sid Mahe atraver distrik Anse Royale. Minis Jumeau ti pe reponn kestyon Onorab Barry Faure pour sa distrik lo distribisyon delo trete dan bann landrwa Anse Royale ki ziska prezan pa pe gannyen.

Enn fwa ki sa proze i konplete PUC pou konsantre lo double kapasite stasyon tretman Mont Plaisir e ranplas tou ban laliny tiyo delo ki tre vye dan distrik Anse Royale. Tou sa bann proze, minis ti dir, ava asir en servis delo trete regilye pour lamazorite zabitan, bann proze komersyal e touristik, bann nouvo vilaz rezidansyel parey Remise ek Enfoncement kot 250 a 300 nouvo flat pe al ganny konstrir dan bann lannen ki pe vini.

Antretan PUC, an kolaborasyon avek Ladministrater Distrik, pe travay lo en lot proze segonder ki pou ganny enplimante par faz e asir distribisyon dan bann landrwa pli dan leo, parey Dan Kre, Dan Zanblon, e dan leo Mont Plaisir ki pa pou benefisye direkteman avek sa sistenm ki pe aktyelman ganny met an plas.  

LINKS