Restan trwa chalets Eden's Holiday Resort apre ki dife ti pran laba Lendi granmaten

Trwa chalets in konpletman detri e enn parsyelman andomaze dan en dife kot Eden's Holiday Resort, Port Glaud, Lendi le 23 Fevriye, granmaten.

Dapre zofisye ansarz brigad tenny dife, Eddy Payet, zot ti ganny alerte par stasyon komann santral ver 2er edmi bomaten konmkwa ti annan sa dife.

Swivan sa lapel dirzans, Msye Payet ti dir ki zot ti deplway de masin e 8 zofisye.

Ler sa lekip ti ariv kot dife zot ti konstate ki ti annan trwa chalets ki ti deza anflanm e en lot ki ti pe komans pran dife.

Ti pran zot apepre 20 minit pour met sa dife anba kontrol e 2er-d-tan pour tenny li konpletman.

Msye Payet in dir ki, swivan zot lanket e dapre bann levidans, i kler ki sa dife in ganny mete par ekspre vi ki partou dan bann chalets enkli kot restoran zot in war e santi loder diferan sibstans ki pran dife fasilman tel ki bennzin ou petrol ki ti'n ganny vide partou.

"I paret ki sa ki'n met sa dife in annan lentansyon pour detri sa landwra an antye," Msye Payet ti dir.

Msye Payet ti osi azoute ki an prenan kont zistans sa bann chalets ek kanmarad in kapab pran sa ki'n met sa dife en bon moman letan pour fer en tel travay, "me i tre probab ki zot in senm sa bann sibstans partou avan e apre met dife dan sa trwa chalets ki pli pre ansanm."           

Fodre fer resorti ki tar lannen pase en dife ti pran kot sa menm letablisman me ti detri selman en chalet.                                         

Popriyeter Eden's Holiday Resort, Msye Vincent Padayachy, pa ti prezan pour donn en deklarasyon me dapre Msye Jean-Claude Arnephy, ki anploye depi en mwan kot sa landrwa e ki reste dan zanmerant, ti dir ki i ti tann kriy dife. An krwayan ki dife ti'n pran zis kot laundry, i ti telefonn Msye Padayachy pour averti li me ler i ti arive i ti vwar ki dife ti pe pran dan bann chalets.

I ti osi dir ki ti napa personn ler i ti arive, eksepte en vwazen ki ti pe sey tenny dife ek en rakor.

Eden's Holiday Resort, ekipe ek 8 chalets enkli en restoran, i ofer en servis self catering.

Dan en lot lensidan ki ti arive Sanmdi swar La Digue, dife ti konpletman detri en pti lakaz an bwa kouver avek tol.

Sa lakaz, ki son propriyeter i Norbert Ladouceur, ti pe okipe par Leon Morel ki pa ti la letan dife ti pran.

LINKS