120 an lanniverser Parwas St. Andre Cascade

En gran lafoul i asiste lanmes solanel

Monsenyer Wiehe ek per Edouard i selebre sa gran lanmes solanel dan lekel plizyer santenn dimoun sorti dan plizyer distrik ti partisipe

En gran nonm kretyen sorti dan plizyer distrik atraver pei ti ransanble Dimans  bomaten (23 Me),  kot legliz St. Andre, Cascade pour partisip dan en gran lanmes solanel selebre pour komemor 120 an lanniverser sa parwas.

Sete Monsenyer Denis Wiehe ek per Edouard, kire parwas Cascade, ki ti selebre sa lanmes, animen par bann parwasyen zot menm.

Zis apre lanmes Monsenyer Wiehe ti ganny loner pour devwal en plak ki trouve dan larantre legliz pour mark sa lokazyon.

Apre, sa gran lafoul kretyen ti ganny sans vizit en legzibisyon ranpli avek portre ki retras diferan staz devlopman relizyez sa parwas. Sa legzibisyon ti pe ganny fer zis an deor legliz kot bann prezan ti kapab osi aste souvenir parey keyring ek triko.

Pli ba kot Sant Kominoter ti annan en tonbola kot ti annan en varyete manze anvant.

Nou pou pibliy plis detaye lo sa levennman pandan lasemenn.

LINKS