Pour komemor Lafet Travayer le 1 Me, Minister Zafer Sosyal ek Lanplwa an kolaborasyon avek Federasyon Linyon Travayer Seychelles ek Lasosiasyon Anplwayer pe organiz en seri aktivite ki pou deroul pandan en semenn.

Komite lorganizasyon bann aktivite in osi travay tre pre avek Minister Gouvernman Lokal, Sport ek Kiltir.

Bann travayer pou ankor enn fwa sa lannen selebre zot lafet atraver plizyer aktivite parey lamars lanvironnman, donasyon disan, lanmes, deba, konferans e osi piknik popiler.

Annefe sa seri aktivite ti sipoze demare yer avek en ‘Environmental Clean Walk’, me sa ti bezwen kennsel akoz move tan.

Pour le 1 Me limenm, ki osi lafet Sen Zozef, patron bann travayer ek legliz Anse Royale, sa legliz pou ankor enn fwa sa lannen organiz en gran lanmes solanel ki pou swiv par en fancy fair. Sa zour pou osi annan ‘Workers dedication’ lo radyo SBC, kot bann travayer pou kapab anvoy bann swe.

Parey lannen pase komite lorganizasyon in vwar li neseser pour ankor enn fwa sa lannen enkli en aktivite imaniter lo progranm e sa i donasyon disan par bann travayer lo Mahe, Praslin ek La Digue ki pou fer depi ozordi Lendi le 26 Avril ziska Sanmdi le 15 Me.

Lo Mahe donasyon pou fer kot Lopital Victoria, tandis ki lo Praslin ek La Digue sa pou pran plas kot klinik Baie Ste Anne le 27 Avril.

Merkredi le 28 Avril bann travayer pou kapab zwenn ansanm dan en lanmes ki pou deroul kot legliz Bon Pasteur apartir 12.15 e la komite pe demann zot pour anmenn zot bann zouti pour beni.

Sa lannen konferans anyel animen par bann reprezantan Minister Zafer Sosyal ek Lanplwa, Lasosiasyon Anplwayer ek lezot linyon travayer pou deroul le 30 Avril kot Sant Konferans Enternasyonal. Tenm ki’n swazir pour sa konferans i ‘Social dialogue as a tool for national development’. E se pandan sa menm konferans ki Minis pour Zafer Sosyal ek Lanplwa Vincent Meriton pou ofisyelman lans Lafet Travayer 2004.

Pour premye fwa pou osi annan lansman en “Labour Day Magazine” ki pou fer pandan seremoni lansman ofisyel sa lafet. Sa magazin pou enkli plizyer lartik lo devlopman lanplwa dan Seychelles, rol bann diferan linyon travayer e pou osi annan plizyer poenm par bann zanfan lekol lo koman zot vwar lazournen travayer.

Sa lannen komite in osi azout serten nouvo aktivite lo progranm parey ‘Radio morning talk’. Atraver sa progranm, ki’n komanse ozordi lo radyo SBC, bann travayer pou ganny diferan pwen refleksyon ki a permet zot reflesir plis lo zot rol koman bann travayer e koman pour adopte en latitid pli pozitiv dan zot landrwa travay.

Bann zenn etidyan ek zenn travayer pou osi ganny sans debat lo tenm moralite dan travay dan en deba ki pou fer lo radyo SBC Zedi le 29 Avril.

Sa selebrasyon pou termin avek gran piknik popiler Dimans le 2 Me lo lans Anse Royale, organize an kolaborasyon avek ladministrasyon distrik.

Dapre Msye Antoine Robinson, tyermenn komite lorganizasyon bann aktivite, sa lannen zot pa’n enkli okenn aktivite mazer le 1 Me akoz sa zour i ganny rezerve pour bann diferan landrwa travay organiz zot prop aktivite.

Travayer lo lezot zil parey Praslin, La Digue ek Silhouette pou osi ganny sans partisip dan plizyer aktivite ki pou enkli rasanbleman relizye, piknik popiler, spektak mizikal e osi night fair.

LINKS