Msye Ramkalawan

Lider Lopozisyon Msye Wavel Ramkalawan Zedi le 26 Fevriye,  ti servi son larepons lo diskour Leta Lanasyon pour kritik sitiasyon ekonomik pei, fer alegasyon lo plizyer size e dir ki i pa dakor ki Prezidan France Albert Rene in deziny Vis-Prezidan James Michel pour ranplas li koman prezidan dan enn a de mwan.

Lot diskour prensipal Zedi bomaten ti fer par Lider Bizness gouvernman dan Lasanble Msye Patrick Herminie ki ti dir ki lopozisyon i kapab dir sa ki zot oule me zot pa kapab dir ki Prezidan Rene pa'n devlop Seychelles.

Nominasyon Vis-Prezidan Michel par Prezidan Rene pour ranplas li letan i sorti koman prezidan in fer parey in prevwar dan Konstitisyon e Prezidan Rene ti ofisyelman anons son desizyon Mardi letan i ti pe delivre son diskour.

Konstitisyon i dir klermen ki an ka ki Prezidan i sorti, parey in anonse, se son Vis- Prezidan ki fini son term ziska lot eleksyon ki dan nou ka i an 2006. Vis-Prezidan Michel ti "running mate" Prezidan Rene pandan sa de dernyen eleksyon Prezidansyel.

Sepandan, Msye Ramkalawan, ki osi sef Parti Nasyonal Seychelles (SNP), ti dir Zedi ki sa pa akseptab. Selon li fodre annan eleksyon akoz Prezidan ti ganny elekte par lepep an 1998 e 2001 e pa'n ariv "okenn lensidan trazik" avek li.

Dapre Msye Ramkalawan lekonomi pe kontinyen deteryore e dimoun pe fer fas avek bokou problenm. I ti dir GST (Goods and Services Tax) pe afekte tou dimoun, biznes pe ganny afekte, lendistri touris pe fer fas avek enn bann lannen pli dir e biznes lapes i riske vin en problenm sa lannen.

Msye Ramkalawan ti azoute ki tou resaman en kantite lanplwa in perdi akoz selon li biznes pa bon, e dimoun pa kapab garanti en bon servis lasante.

Selon li i osi annan serten privilez dan biznes kot enn de marsan i reisi ganny deviz pour vann tou keksoz e lezot pa gannyen.

Lider Lopozisyon ti dir ki fodre "ini pour aret sa deteryorasyon ki pe menas nou nasyon e lavenir nou pei."

Dan son diskour, Msye Ramkalawan ti osi fer plizyer alegasyon pour esey demontre ki nanryen pa pe marse e tou bann plan pa pe abouti dan nanryen.

Msye Ramkalawan ti dir ki SNP i travay lo en "azanda liberal ki nou kwar i semen pour nou pran nou pei e anmenn li pli devan."

De son kote letan i ti pran laparol, Msye Herminie ti dir ki i pa normal pour esey fer dimoun kwar ki napa nanryen dan Seychelles ki pe marse e ki nanryen pa'n ganny fer pandan sa 26 an ki Front Progresis Pep Seychelles (SPPF) in o pouvwar.

I ti dir ki diskour Prezidan Larepiblik in en lokazyon pour ki tou sitwayen i ankor enn fwa fer en legzanmen-d-konsyans e deside enn fwa pour tou "kote koman en nasyon nou ete e kote nou le ale."

Msye Herminie ti dir ki i pa normal pour pran enn de problenm ki pei pe pas ladan ozordi  e fer kwar ki nanryen pa'n ganny fer e nanryen pa pe marse. I pa normal, par egzanp, i ti dir, pour  ziz tou sa bann bon keksoz ki sistenm lasante in fer e pe kontinyen fer atraver problenm ki'n arive avek sofaz delo oubyen "lift" kase.

Prezidan Rene ek SPPF, i ti dir, in fer en kantite pour Seychelles e parti e nouvo dirizan ki pe vini i annan bokou ankor pour fer pour asire ki nou batir lo sa ki nou'n akonpli.

I ti dir: "Mwan osi monn zwenn dan sa refleksyon e mon trouble pour mazinen kote nou pei ti ava ete si pa ti pour Msye Rene e son vizyon sosyalis e sa milye zonm ek fanm Seselwa ki ti partaz sa vizyon avek li."

I ti dir ki i reste kovenki ki ozordi sa sistenm i reste sel sistenm ki garanti ki nou zanfan i grandi dan lafyerte e vin sa ki zot anvi.

I ti azoute ki bann problenm ki Lopozisyon i koz lo la i rezilta en peryod resesyon ki pei pe pas ladan apre ki in fer bokou lenvestisman pour devlop son dimoun. Tou bann pei ki'n fer en tel lenvestiman, i ti dir, in a en moman ou en lot pas atraver difikilte parey.

Bann problenm, Msye Herminie ti dir, pou ganny rezourd sirtou atraver progranm makro-ekonomik, menm si konmela i pe fer lavi en pe dir.

Konsernan pwen-d-vi  Lider Lopozisyon lo nominasyon Vis-Prezidan Michel koman prosen Prezidan, Msye Herminie i dir i pa konpran son largiman akoz sa i dan Konstitisyon e li Msye Ramkalawan i ti la letan sa amannman ti pe ganny diskite.

Swivan sa de lentervansyon, lezot manm ti osi donn zot reaksyon lo diskour Leta Lanasyon. Deba ti ale ziska tar apremidi e i ekspekte kontinyen Vandredi le 27 Fevriye.

LINKS