Plizyer nouvo lenfrastriktir pou ganny konstrir tre byento en pe partou atraver pei pour ankouraz devlopman bann pti ek mwayen biznes.

Se Minis pour Lendistri ek Biznes Enternasyonal, Msye Jacquelin Dugasse, ki ti fer sa lanons letan i ti pe reponn kestyon Manm Lasanble pour distrik Grand Anse Praslin, Onorab Norbert Lepathy, lo ki bann incentives ki son minister i anvizaze met anplas pour ankouraz plis devlopman bann pti ek mwayen biznes lo Praslin.

Minis Dugasse in reasir Onorab Lepathy ki tou biznes atraver pei i zouir bann menm incentives e gras a sa bann incentives ki'n ganny met anplas pour ankouraz kreasyon ek devlopman bann biznes i annan aktyelman anviron 4,000 pti biznes ki pe fer en kontribisyon enportan dan domenn lanplwa ek kreasyon larises ekonomik nasyonal.

Parmi bann lenfrastriktir, Minis Dugasse ti fer resorti ki bokou in fer dan sa direksyon kot in annan serten landrwa ki'n ganny dezinyen pour devlopman biznes tel parey sit endistriyel, Providence, kot 340,000 met kare later in ganny met a dispozisyon bann biznes pour devlopman. Sit endistriyel baze Union Vale i enn parmi plizyer lezot sit apopriye ki'n ganny idantifye.

Menm si dan ka Praslin napa bokou ki'n ganny fer dan lepase lefe ki i annan konstrent teren, gouvernman in vwar li neseser pour enkli dan proze konblaz lo sa zil serten morso later konble pour devlopman biznes.

Minis Dugasse ti devwale ki dan bann prosen mwan 6.6 ektar later ki pou ganny devlope pour pti biznes lo Praslin, pou ganny met a dispozisyon son minister ensi ki SIDEC. In osi azoute ki ankor 5.2 ektar pou ganny azoute avek sa 6.6 ektar pour permet plis devlopman biznes lo Praslin.

Minis Dugasse ti osi koz lo bann lenfrastriktir debaz ki pou ganny mete anplas e lwe a en pri rezonnab avek bann ki napa mwayen pou konstrir zot prop batiman.

Lo kote finansman, Minis Dugasse ti eksplike ki i annan en seri mekanizm anplas parey YES Scheme, Small Business Finance Facility (SBFF), European Union (EU) loan facility, Labank Devlopman e osi lezot labank komersyal ki osi asiste bann ki anvi envestir dan en biznes. Sa bann fasilitater finansman i osi annan diferan kondisyon anplas pour ed bann antreprener. I osi annan sipor enstitisyonnel parey Minister Lendistri ek Biznes Enternasyonal ensi ki SIDEC ki asiste bann biznes avek formasyon ek seminar.

Anliny avek sa bann incentives Minis Dugasse in anonse ki lo kote Praslin i annan plan pour konstrir 12 kyosk lo later konble Baie Ste Anne, ki pou ganny lwe avek bann artizan, ensi ki en craft centre, Amitié, zis akote erport.

Me proze pli enportan ki ekspekte demare an Zilyet sa lannen i konstriksyon de parmi sis Micro Enterprise Centre  Cap Samy, Praslin. Sa nouvo proze ki pou kout 5.1 milyon roupi pou enkli konstriksyon de sant avek bann fasilite parey latelye, garaz, show room  ek lezot fasilite debaz pour reasir devlopman biznes lo sa zil.

Minis Dugasse ti fer remarke ki sa proze i form parti en volim sis proze (4 lo Mahe ek 2 lo Praslin) ki gouvernman pe antreprann.

Fodre fer remarke ki apre negosyasyon avek Labank Devlopman boner sa lannen, SIDEC ti dakor pour kontribye 2.1 milyon roupi dan sa 5.1 milyon roupi e larestan larzan in finanse par Labank Devlopman.

Pour rezon retar dan negosyasyon pou ganny finansman gouvernman ti deside pour retard sa proze e donn priyorite lezot proze ki ti'n deza fini ganny finansman.

Apre bokou letid e lefe ki i annan gran demann pour fasilite biznes lo Praslin gouvernman in vwar li en priyorite pour fer sa premye Micro Enterprise Centre, Cap Samy.

Sa nouvo proze pou ganny konstrir lo en siperfisi 3700 met kare later ki pou konpri trwa blok. Premye faz sa proze pou demar avek konstriksyon en premye blok 8 younit ki pou enkli 8 latelye. Pou osi annan bann fasilite debaz parey parking.

Swivan kestyon Onorab Ginette Gamatis, Manm Elekte pour distrik Port Glaud, lo plan pour konstrir bann kyosk pour bann pti biznes dan sa distirk, Minis Dugasse ti dir ki avek bi desantraliz lavant prodwi lartizana, son minister i annan plan konstrir de kyosk, en pti galeri lar ek en kafe dan sa distrik. Sa proze ki pou kout 211,000 roupi i ekspekte komanse an Out sa lannen e pe finanse par SIDEC.

LINKS