Kolok Enternasyonal 2003 in rekomande ki bann ansenyan langaz i ganny plis formasyon lengwistik afen ki zot a kapab pli byen ansenny lalang Kreol dan bann lenstitisyon skoler.

Annefe, sa ti enn parmi plizyer rezolisyon ki Kolok ti prezante pandan seremoni klotir sa aktivite Merkredi 29 Oktob apremidi kot Lenstiti Kreol.

Sa konferans trwa zour ki ti regroup plizyer kreolis sorti dan kominote kreol ek bann akademisyen enternasyonal ki fer resers dan domenn Kreol ti deroul anba tenm Kreol : En lalang dinamik dan lemonn.

Kolok in osi agree pour relans lasosiasyon zil kreol e sa dapre Madanm Penda Choppy, direktris Lenstiti Kreol, ava fer lalang Kreol bouz pli devan.

Sa lasosiasyon i ekspekte regroup tou bann zil kreol dan Losean Endyen (Maurice, Reunion, Seychelles) e osi lezot zil dan Caraibe parey Martinique, Guadeloupe, Haiti e La Louisianne.

Pandan sa trwa zour bann partisipan in egzamin rol ki Kreol koman en group lalang i zwe dan lemonn ozordi, par rapor avek bann kominote kot Kreol i en lalang vivan.

Atraver bann deba zot in osi egzamin sitiasyon langaz vizavi politik lalang lo Kreol dan lemonn, egzamin stati Kreol dapre son lizaz dan bann kominote kreol e lo lasenn enternasyonal ensi ki son lizaz profesyonnel.

Atraver Kolok 2003 bann serser in partaz bann devlopman ek dekouvert resan ki zot in fer dan letid lalang Kreol.

Madanm Choppy in osi dir ki Kolok sa lannen in en sikse e ki i tre satisfe avek partisipasyon Seselwa sirtou bann etidyan Lenstiti Nasyonal pour Ledikasyon ki ti tre nonbre.

I ti dir ki bann prezantasyon lo rezilta resers lo lalang Kreol i montre ki nou lalang i vivan.

Plizyer piblikasyon kreol par bann ekriven diferan zil kreol ti osi an egzibit.

LINKS