Minis pour Zafer Sosyal ek Lanplwa Vincent Meriton in demann ek tou travayer pour ralye deryer nouvo Prezidan James Michel dan en lespri partenarya, kot tou bann partner - depi gouvernman, anplwayer ek travayer - zot zwe zot rol byen, pour ki nou kapab fransir bann baryer e anmenn plis prosperite pour nou tou.

“En fason pour anrisir sa partenarya dan landrwa travay se dyalog ant gouvernman ek sekter prive osi byen ki dyalog ant travayer e anplwayer. Alor mon oule sezi sa loportinite pour demann bann travayer ek bann anplwayer pour met plis zefor dan kominikasyon, konsiltasyon ek lantant,” Minis Meriton in dir dan son mesaz alokazyon Lafet Travayer le 1 Me.

Dan son mesaz Minis Meriton in dir ki Gouvernman pou kontinyen devlop bann polisi e ranforsi bann lalwa ek regilasyon pour kontinyelman donn sipor bann travayer ensi ki bann anplwayer dan promosyon bann bon valer dan travay.

“Mon osi fer en lapel avek tou travayer pour kontinyen travay dir e deklar lager kont tou keksoz ki met retar dan prodiksyon. Dan premye ran i lager kont mank disiplin. Annou reflesir pou ogmant prodiktivite. Annou ariv travay a ler e respekte nou siperyer ek nou koleg. Annou pa obliy lafyerte pour en lazournen travay byen konplete,” Minis Meriton in dir dan son mesaz.

Minis in osi demann bann paran pour ranforsi dan zot zanfan bann valer tel ki respe, lanmour pour travay ek lafyerte pour en karyer.

“Pour bann zenn ki ozordi zot ankor dan lekol, mon envit zot pour komans fer refleksyon lo zot lavenir koman en travayer. Lavenir nou pei ek sikse nou lekonomi i depan lo zot. Ozordi zot pe zouir fri travay bann travayer ki’n pran zot retret e bann ki ankor pe travay. Ler pou arive kot a zot tour zot pou pran sa bann responsabilite e kontinyen batir nou sosyete afen ki bann ki vin apre zot a kapab zouir bann benefis zot zefor,” Minis i dir dan son mesaz.

“Mon bann ser ek frer travayer, konstriksyon lavenir nou pei i lo zepol sakenn de nou. Alor annou pran lokazyon lafet le premye Me pour nou reflesir lo sa latas nob ki nou’n ganny privilez pour akonplir,” mesaz Minis Meriton i azoute.

LINKS