Sis dimoun i ganny blese dan en aksidan

Oli bout deryer sa loto?

Sis dimoun ti raport lopital Mardi 2 Mars bomaten apre ki en bis Tata ek en loto prive ti fer kolizyon Au Cap.

An rezilta sa aksidan, ki ti ariv zis apre 7er bomaten dan zanmerant Night Spot Discotheque e restoran Ty-foo, morso deryer sa loto ti separ konpletman avek son bout devan e al rann lapel detrwa met pli lwen . Sa bis li ti al fini dan en lanmar vizavi sa diskotek.

Drayver sa loto, en zonm 34 an ki sorti Anse Royale e ki ti le sel dimoun dan sa transpor, ti admit lopital Victoria avek dimal dan latet tandis ki senk pasaze ki ti dan sa bis Tata ti ganny trete e apre large.

Sa loto ti pe desann dan direksyon lavil e sa bis Tata ti pe al dan sid ler aksidan ti arive.

Lapolis in ouver en lanket pour determin sirkonstans sa kolizyon.

Dan en kominike lapres, lapolis in antretan eksprim konsern lo lakantite transpor ki antre dan pei an morso e plitar ganny asanble lokalman.

Dapre sa kominike, i paret ki sa loto ki'n enplike dan sa aksidan i enn sa bann transpor ki'n ganny asanble isi.

LINKS