Madanm Rene ek Minis Ernesta i prezant kado avek de parmi sa trantenn dimoun avek dezabilite ki ti ganny rekonpanse Merkredi

Madanm Rene ek Minis Ernesta i prezant kado avek de parmi sa trantenn dimoun avek dezabilite ki ti ganny rekonpanse Merkredi

Minis pour Zafer Sosyal ek Lanplwa, Dolor Ernesta, in demann bann dimoun avek dezabilite pour devlop tou bann potansyel ki zot annan.

I ti dir ki zis letan “bann trezor kasyet dan bann dimoun avek dezabilite” i ganny dekouver ki nou pep ava kapab angaz li avek bokou plis determinasyon ek resours pour asire ki sa bann potansyel ki kouve dan sa bann dimoun a ganny devlope.

Minis Ernesta ti pe koz kot SMB Exhibition Hall, Roche Caiman, Merkredi, pandan en seremoni pour rekonpans bann dimoun avek dezabilite pour zot zefor remarkab dan diferan domenn.

Sa prezantasyon ti annefe enn parmi plizyer aktivite ki ti'n ganny organize pour selebre Lazournen Enternasyonal bann Dimoun avek Dezabilite ki tonm le 3 Desanm.

Minis Ernesta ti dir ki i enportan ki nou reflesir lo kwa ki nou pei pe fer pour bann dimoun avek dezabilite ki annan kouraz ek determinasyon pour devlop zot potansyel e se apre ki sa bann potansyel in ganny devlope ki bann dimoun avek dezabilite pou annan zot prop lavwa.

Sa, i ti dir, i an relasyon avek tenm nasyonal ki’n swazir pour sa lannen – "Kouraz ek determinasyon pour devlop mon potansyel" – e osi tenm enternasyonal ki "Nou prop lavwa".

Minis Ernesta ti osi demann bann lorganizasyon gouvernmantal, non-gouvernmantal ek prive pour re-evalye travay ki zot pe fer pour ed bann dimoun avek dezabilite pour devlop zot potansyel.

"Nou tou nou annan bokou pour fer. Me pa zanmen annan okenn dout ki nou pou bezwen fer li ansanm," i ti dir.

Ti osi annan lapel spesyal pour bann paran ki annan sa premye responsabilite pour asire ki zot bann zanfan ki pe viv avek dezabilite kelkonk pa ganny retire dan aktivite devlopman nou pei.

Minis Ernesta ti osi salye sikse bann atlet avek dezabilite atraver zot partisiapsyon dan bann zwe enternasyonal, ki i ti dir in fer Seychelles fyer.

Lo son kote Madanm Sarah Rene, Tyermenn Konsey Nasyonal Dimoun avek Dezabilite, ti demann sa bann dimoun ki pa'n kapab fer nanryen sa lannen pour ki lannen prosenn zot esey fer en keksoz lo zot menm.

Lefe ki lasosiasyon dimoun avek dezabilite pa pe fonksyonn parey i devret, Madanm Rene in osi swete ki bokou plis dimoun i zwenn sa lasosiasyon avek bi fer li bouze.

Lo non bann dimoun avek dezabilite Betty-May Farabeau ti reasir bann prezan ki malgre zot dezabilite zot osi annan bokou abilite e i ti osi remersye tou bann ki kontinyen fer sir ki zot ganny lasistans neseser.

En trantenn dimoun avek dezabilite sorti dan diferan lenstitisyon ek plizyer distrik lo Mahe ti ganny rekonpanse pour zot performans eksepsyonnel dan diferan domenn parey ledikasyon, kiltir, lanplwa, sport ek travay kominoter.

Sa prezantasyon ti swiv par en performans kiltirel ki ti enkli ladans fer par bann dimoun avek dezabilite e osi en dezennen.

Prezan kot sa seremoni ti osi Madanm Marie-Ange Hoareau, sekreter prensipal dan Minister Lanplwa ek Zafer Sosyal; Madanm Marja MacGaw, sekreter prensipal dan Minister Lasante; Msye Vincent Meriton, sektreter prensipal Gouvernman Lokal; bann manm Lasanble Nasyonal, bann ladministrater distrik e osi paran ek zanmi bann dimoun avek dezabilite.

Kant a bann dimoun avek dezabilite lo Praslin ek La Digue ki pa ti prezan kot sa seremoni Merkredi, zot ekspekte selebre zot lazournen avek en seri aktivite sa wikenn.

LINKS