Sesyon kestyon dan Lasanble Nasyonal

Swivan bann amannman ki'n ganny fer dan lalwa lanplwa pandan sa bann dernyen lannen, Minister Zafer Sosyal ek Lanplwa in war li neseser pour reviz sa lalwa (Employment Act) dan son totalite, pour kit li azour avek bann sanzman o nivo nasyonal e global.

Sa ti ganny dir par minis responsab pour sa minister, Msye Dolor Ernesta, dan Lasanble Nasyonal Mardi 3 Zen  pandan sesyon reponn kestyon. I ti pe donn plis leklersisman lo plan son minister pour reviz lalwa lanplwa swivan en kestyon demande par manm Onorab Waven William pour distrik Grand Anse Mahe.

Dernyen fwa ki lalwa lanplwa ti ganny revize ti an 1995 e depi sa plizyer amannman in ganny fer kot bann nouvo provizyon in ganny enkli. Anliny avek sa, minis ti dir ki son minister ti'n antre an diskisyon avek son de partner prensipal, ki enkli Federation of Seychelles Workers' Union (FSWU) e Federation of Employers Association of Seychelles (FEAS), pour revwar serten seksyon dan sa lalwa lanplwa e tonm dakor lo bann nouvo regilasyon ki fodre ganny entrodwir.

Sa nouvo lalwa, minis ti dir, i ekspekte pare dan ankor trwa mwan e i pou osi anliny avek bann mezir ek stratezi ki pou ganny enplimante dan sa nouvo plan ekonomik ki ekspekte ganny prezante sa mwan ensi ki bann kriter bann konvansyon Lorganizasyon Mondyal pour Travayer (ILO) ki Seychelles in ratifye.

Sa nouvo lalwa, minis ti dir, i pou enn ki pou osi fleksib e reponn bann bezwen endistriyel. 

Minis ti osi reponn en lot kestyon par Onorab William lo plan son minister pour asiste ankor plis bann dimoun avek dezabilite.

Minis ti fer resorti ki gouvernman in toultan annan en lapros pozitif anver bann dimoun avek dezabilite e bokou in ganny fer par son minister pour asiste zot dan plizyer fason.

I ti dir ki pandan sa dernyen lannen son minister in konmans en legzersis pour vwar ki mannyer i kapab amelyor ankor plis son bann servis e revwar rol serten lenstitisyon parey Sant Reabilitasyon.

Minis ti dir ki zot annan plan anmenn tou bann servis reabilitasyon anba en sel parasol pour fer ki sa bann servis i vin pli efikas.

Bann dimoun avek dezabilite, i ti fer remarke, pe deza zouir bann servis parey benefis sekirite sosyal, carer, means testing e lezot lasistans atraver plizyer lorganizasyon non-gouvernmantal.

I ti dir ki son minister ti pe met lanfaz lo nesesite annan bann fasilite, sirtou dan bann batiman, pour ki dimoun avek dezabilite i ganny akse dan sa bann landrwa.

LINKS