Zistans ki Seychelles in arive dan son devlopman ek progre, sak endividi i devret konsyan ki bann move latitid ek mantalite ki pe dousman enfiltre dan nou sosyete pa dan lentere pei me pou plito detri tou sa ki nou'n travay dir pour akonpli.

Sa ti lopinyon laplipar bann manm ki ti entervenir dan Lasanble Nasyonal Zedi apremidi letan zot ti pe donn zot reaksyon lo diskour Leta Lanasyon ki Prezidan France Albert Rene ti fer Mardi.

Bann manm ki ti donn zot reaksyon pandan sesyon apremidi ti enkli Waven William, Rukaiya Jumaye, Anne Marie-Mathiot, Terrence Mondon, Isabelle Joubert, Louis Gopal (Fron Progresis Pep Sesel), Hardy Lucas, Nicolas Préa e Gérard Julie (Parti Nasyonal Sesel).

Laplipar manm ti byen akey deklarasyon Prezidan ki fodre met en fren avek bann eleman negatif tel parey vyolans, malonnekte e koripsyon ki pe pti a pti ronz nou sosyete.

Servis piblik, zot ti dir, i definitivman bezwen ganny transformen pour donn sa servis ki i devret me non pa fer dimoun malere, sirtou biro later ek lakaz kot i annan bokou konplent ki bann zofisye pa pe desarz zot travay parey fodre.

Sa bann kalite mantalite, zot ti fer resorti, pa pou ditou ed nou pei ariv kot i pe swete arive sirtou dan sa lannen 'Dinamizm Ekonomik". Tou manm ti osi koz fortman lo size moralite ek spirityalite e zot ti dakor ki fodre sa de valer pa zanmen divorse.

Anplis ki sa, bann manm ti osi tous lo lezot pwen ki Prezidan in fer sorti dan son ladres e felisit li konmkwa i reste sa zonm ki konn santiman ek laspirasyon pep Seselwa.

Onorab William, reprezantan distrik Grand Anse Mahe, ti dir ki apre lapel Prezidan, tou dimoun in devret pare pour angaz zot pour travay dan lentere pei e ki bann landrwa ou biro gouvernman ki'n ferm zot lizye dan lepase lo zot problenm i aprezan debout ferm e esey redres zot sitiasyon.

Konman en zenn ki'n ganny enspire avek ladres Prezidan, Onorab Jumaye, manm proporsyonnel pour SPPF, ti dir tou sikse ki pei in akonpli i riske perdi dan labsans valer moral ek spirityalite. I ti dir ki lazenes i labaz nou sosyete alor nou bezwen enkilke dan zot sa bon latitid ki pou ed zot bouz pli devan e profit bann mekanism ki anplas pour zot prop devlopman personnel.

Onorab Mathiot, manm elekte pour Anse Etoile, ti dir a son tour ki in ganny motive par ladres Prezidan. I ti byen akey sa progranm Customer Care me dir ki trening i neseser pour ogmant performans dan tou sekter alor sa i devret priorite lo azanda gouvernman.

Onorab Mondon, manm elekte pour Takamaka, ti dir ki Prezidan in propoz solisyon pour bann defi ki pei i annan devan li atraver en nouvo lanvironnman travay ki nou menm nou pou bezwen kree. I ti azoute ki zefor gouvernman pour transform servis piblik pa ase akoz i bezwen korporasyon tou dimoun pour ki lepep Seselwa i reganny son zantiyes, lonnekte, lanmour ek respe pour kanmarad.

Onorab Joubert, manm proporsyonnel SPPF, ti koz lo tenm pour sa lannen e dir ki sa i devret konsolid bann devlopman sosyal ek ekonomik pei. I ti dir ki gouvernman i annan bon lentansyon alor fodre lezot dimoun i donn en kou-d-men.

Manm elekte pour Mont Fleuri, Onorab Gopal, ti deplor bann mantalite ki kre divizyon dan Seychelles e dir ki bokou pei pe ozordi soufer akoz zot pa'n reisi konbat degradasyon bann valer moral ek spirityalite. I ti enplor lasosyete pour pa les nou pei vin parey e pour zwenn gouvernman dan son zefor pour redres sitiasyon.

Bann manm lopozisyon ki ti pran laparol ti dir ki kontrerman, zot pa'n vreman ganny enspire par diskour lo Leta Lanasyon akoz i pa'n adres bann vre problenm pei. Zot ti dir ki Seychelles i reste ankor avek bokou defi ki malerezman pou retard son devlopman.

Onorab Lucas, manm proporsyonnel, ti toudmenm akey swe Prezidan pour ki i annan plis konsiltasyon ant gouvernman ek lezot partener, sirtou ant bann biro administrasyon ek politisyen dan lopozisyon. I ti dir i swete ki bann aksyon ki ganny pran dan lefitir i ava dan lentere tou Seselwa.

Menm lopinyon ti ganny eksprimen par Onorab Préa, reprezantan pour Bel Ombre, ki ti osi dir ki lekonomi Seychelles pa pe marse akoz bann problenm mazer pa pe ganny adrese. Labi ek gaspiyaz i kontinyen dan pei e sa pa pe ditou anmenn rannman, i ti note.

Onorab Julie, manm elekte pour Mont Buxton, ti dir ki bann problenm pertinan parey dan ledikasyon, lasante ek domenn sosyal pa'n ganny okenn rekour, alor keksoz pou kontinyelman al mal. I ti dir i sirprann ki Prezidan pa'n abord size pri lavi ki dapre li, pa'n desann ditou menm apre sa ki in dekrir konman "plizyer gran koze lo sa size".

LINKS