Mesaz Minis Vincent Meriton alokazyon Lafet Zanfan

‘Annou met zefor ansanm pour amelyor sitiasyon lavi nou zanfan’

Minis Meriton

“Annou ansanm nou tou reflesir e pran aksyon neseser pour ki sitiasyon lavi sak nou zanfan i vin sa ki i devret ete.”

Sa i form parti mesaz Minis pour Zafer Sosyal ek Lanplwa, Vincent Meriton, alokazyon Lazournen Nasyonal Zanfan Mardi 1 Zen.

Sa lannen sa lazournen pe ganny selebre anba tenm “Responsabilite e Tolerans”.

Dan son mesaz, Minis Meriton i dir ki sa lazournen i non selman en lokazyon lafet me osi en lokazyon pour tou zanfan reflesir lo kalite lavi – materyel osi byen ki spirityel -- ki zot pe viv koman zanfan.

Minis Meriton i dir dan son mesaz ki tandis ki lo kote materyel tou nou zanfan pe ganny swen neseser, i reste ankor bokou pour fer pour devlop plis sa swen lo kote spirityel, kot bann bon valer moral i vin sa fondasyon neseser pour ki zanfan i devlop pour vin bann bon sitwayen.

“Tenm sa lazournen i lans en lapel avek tou zanfan pour egzamin zot lavi vizavi sa tenm, e fer amelyorasyon kot i neseser. Responsabilite e tolerans i devret ganny pratike depi pli boner posib, deza a sa zenn laz ki zot ete,” Minis Meriton i dir.

Dan son mesaz, Minis Meriton i dir ki lazournen zanfan i osi en lokazyon ki donn nou sans koman en nasyon pour revwar en pe ansanm nou rol, nou devwar e nou responsabilite anver nou zanfan.

I fer remarke ki sa tenm lespri ‘Renesans Moral’ ki nou'n ganny apele pour viv sa lannen, i pour nou get de pre sa responsabilite moral ki nou annan anver nou zanfan koman paran, edikater, manm nou kominote e sosyete an zeneral.

“Eski nou pe fer tou sa ki nou kapab pour ki nou zanfan i ne e grandi dan en lanvironnman e dan en fason ki ed zot devlop e epanouir dan tou zot fakilte? Ler nou koz lo valer moral eski nou pe donn zanfan otour nou bann bon legzanp pour zot swiv? Atraver nou konportman koman adilt ki mesaz, ki lespwar nou pe donn nou zanfan?” Minis i demande dan son mesaz.

“Dan nou pei i annan bokou lakonplisman dan devlopman zanfan. Sepandan nou war bokou sitiasyon kot zanfan i ganny neglize e abize. Tro bokou sitiasyon kot dan fanmiy menm zanfan pe ganny zot legzistans menase par mank swen e proteksyon, kot zanfan pe sibir neglizans paran. Sa i anmenn nou pour demann nou lekor eski nou lalwa pe donn ase proteksyon zanfan e osi eski lalwa pe ganny aplike koman fodre. Annou ansanm nou tou reflesir e pran aksyon neseser pour ki sitiasyon lavi sak nou zanfan i vin sa ki i devret ete,” Minis Meriton i dir dan son mesaz.

Minis in felisit tou fanmiy ki pe elve zot zanfan avek lafeksyon dan lanmour, respe e latolerans.

“Annou fer li nou responsabilite pour donn nou zanfan en bon demen,” Minis i dir.

Minis i termin son mesaz par swet tou zanfan dan Seychelles en tre bonn fet e remersye tou endividi, lorganizasyon gouvernmantal, non-gouvernmantal e group saritab ki pe travay pour byennet e devlopman zanfan.

LINKS