Minister Lasante in lans en lapel avek manm piblik pour respekte tou propriyete leta ek bann lekipman medikal ki ganny servi pour byennet kominote.

Sa ti vin apre ki serten dimoun ti kas en konpartiman kot klinik Les Mamelles e vol en konpreser ki ganny servi pour fer marse bann lekipman danter parey dril.

Sa vol ti ariv dan lannwit Merkredi Avril 7 e i fer trwazyenm konpreser ki ganny vole kot sa klinik.

Pandan sa de trwa dernyen lannen trwa lezot konpreser in ganny vole kot sant lasante English River, Plaisance ek La Digue.

Ler i ti pe koz avek lapres, direkter servis danter kot sa klinik, dokter Harold Pothin, ti dir ki i tre konsernen par bann ka vol ek vandalizm ki i ti dir pe ogmante e pe donn klinik Les Mamelles en move repitasyon.

I ti dir ki en tel aksyon in aprezan redwir kapasite servis danter kot sa klinik e pe afekte bann pasyan sa distrik limenm e osi bann ki reste La Misère. 

I ti fer remarke ki enn sa konpreser i kout R10,000.

I ti dir ki apre sa bann ka vol ki'n arive minister pou bezwen etidye seryezman fason pour ogmant sistenm sekirite kot bann sant lasante.

I ti dir ki kot klinik Les Mamelles zot pe esey travay lo fason pour ranforsi sekirite kot sa konpartiman dan ki sa konpreser ti'n ganny mete.

Dokter Pothin ti eksplike ki sa konpreser ti'n ganny mete dan en konpartiman deor akoz i bezwen bokou vantilasyon e louvertir.

LINKS