Kat mwan apre ki lotorite ti dekouver en torti-d-mer vivan kot en lakour Cascade, en senaryo parey in ariv ankor, safwasi Pascal Village.

Dan sa dernyen lensidan, sa torti, en mal ki mezir en met trwa santimet longer e 94 santimet larzer, ti ganny kouver Zedi 12 Fevriye aswar anba en prela ble anba en langar kot en lakour Pascal Village. Sa torti ti pez apepere 100 kilo.

En zonm, aze 36 an, ti ganny arete e kestyonnen an koneksyon avek sa lensidan me i ti apre ganny large lo bail.

Dapre port-parol lapolis Jean Toussaint, sete ver 5.30 apremidi Zedi ki zot ti ganny alerte konmkwa ti annan en torti-d-mer kot en lakour.

Swivan lafouy ki lapolis ti fer kot sa lakaz, serten kantite lavyann torti sale ti osi ganny dekouver dan de bwat dan kabinet dan lakwizin.

Msye Toussaint ti dir ki zot pe tret sa ka tre seryezman pour fer ki o pli vit ki posib i ganny anmennen devan lakour.

I ti dir ki pour le moman i annan antou sis ka posesyon torti oubyen lavyann torti ki'n pas dan lanmen lazistis. Ladan de in aparet devan lakour e lanket i ankor pe ganny fer lo kat lezot, enkli sa enn ka Pascal Village.

Sa torti ti ganny large dan delo sale Beau Vallon par bann zofisye Minister Lanvironnman e Resours Natirel zis apre ki i ti'n ganny dekouver.

Lo son kote sa minister in ankor enn fwa deplor sa kalite akt ki dimoun pe fer e in remersye manm piblik ensi ki lapolis pour lasistans ki zot pe donnen pour ede dekouraz dimoun kontinyen touy oubyen manz torti-d-mer, ki en lespes proteze.

LINKS