Lasosiasyon bann maren dan la rezyon i diskit lavenir 

En portre souvenir bann partisipan alafen seminar

Komite rezyonnal pour byennet bann maren dan Losean Endyen ek Sid Lafrik ti zwenn isi sa semenn dan en seminar de zour kot zot ti ganny sans diskit lo zot bann plan ek proze pour lavenir.

Sete Monsenyer Legliz Katolik, Denis Wiehe, ki ti ouver sa seminar Mardi le 11 Me, kot lotel Le Surmer, Pointe Conan.

Sa seminar ti regroup repezantan diferan pei dan Losean Endyen ek Sid Lafrik ki manm lasosiasyon bann maren e osi prezan ti reprezantan Seafarer International Trust Fund (ITF) Tom Holmer.

Pandan sa rankont, ki ti pe dirize par Morisyen Jean Vacher, ki osi kordinater sa komite rezyonnal, plizyer pwen konsernan bann plan ek konvansyon ki pou benefisye bann maren ti ganny met devan.

Parmi ti plan pour ratifye serten konvansyon Lorganizasyon Enternasyonal bann Travayer ki dir ki bann maren i devret ganny ofer bann fasilite de baz e lezot servis dan en por swivan en ka detres.

Aparaman selman La Réunion dan rezyon Losean Endyen ki’n deza enplimant en tel konvansyon.

Lezot topik ki ti ganny diskite i maladi Sida parmi bann maren. Dapre bann diskisyon, plis progranm sansibilizasyon i devret ganny fer pour konsey bann maren lo sa size.

En lot deba dan sa seminar ti lo bann aktivite ki kapab ganny fer pour ede finans bann proze a lavenir ler ITF pou aret donn sipor finansyel an 2005.

Fodre fer remarke ki ITF i pare pour finans konstriksyon en sant isi Seychelles pour akey bann maren etranze e Seselwa.

Dapre reprezantan Apostolat de la Mer, Albert Napier, zot pe zis esper en teren avek gouvernman pour zot kapab konmans sa proze avan 2005 ler ki ITF pou kennsel sa fon si i pa ganny servi.

Dan lepase, ITF in asiste Apostolatus Maris avek transpor ek lezot lekipman travay ki ganny servi dan lofis. Bann pei vwazen in osi benefisye ek sant lakey, ordinater ek lezot don.

Alafen seminar plizyer rezolisyon ti ganny met devan.

LINKS