Lazournen Enternasyonal Lafanmiy

Lafanmiy i devret reste pilye sosyete – Minis Meriton

Minis Meriton

“Lafanmiy i devret toultan sa baz enportan dan lavi zanfan. Lafanmiy i sa fwaye lanmour, respe ek lapartaz kot zanfan i ne e grandi, kot i aprann viv. Si nou lavi fanmiy i solid, sosyete ek pei pou osi solid.”

Sa i form parti mesaz Minis pour Zafer Sosyal ek Lanplwa Vincent Meriton alokazyon Lazournen Enternasyonal Lafanmiy Sanmdi le 15 Me.

Sa lannen i fer 10 an depi ki sa lazournen dedye a tou fanmiy pe ganny selebre.

Pour sa lokazyon,  Nasyon Zini pe demande ki nou adopte en progranm travay konkret pour ki bann fanmiy i kontinyen ganny sa soutyen neseser pour zot asir sa rol enportan ki zot annan dan lavi dimoun e dan sosyete.

Dan son mesaz, Minis Meriton i fer remarke ki isi Seychelles Gouvernman in deza konsolid son langazman anver byennet bann lafanmiy.

“Lenportans ki Gouvernman i mete lo rol fanmiy dan devlopman pei ti ganny soulinyen dan mesaz 'renesans moral'. I rol nou tou pour regard nou lavi, regard sa bann bon valer Seselwa e regarde kote nou kapab amelyor nou lavi pour byennet nou zanfan e prosperite pei,” mesaz Minis Meriton i dir.

“Se pour reflekte sa mesaz ki nou’n deside selebre sa lazournen anba tenm "Fanmiy: Pilye Renesans Moral". Nou konvenki ki se atraver bann fanmiy solid ki nou kapab arive sirmont bann lobstak ki nou fer fas avek.

“Bann fanmiy, atraver bann fonksyon enportan ki zot desarze, i form labaz sosyete. Se dan lafanmiy ki nou grandi e form nou bann premye enteraksyon imen. Se dan fanmiy ki nou aprann bann valer lavi, kot nou ganny lanmour, swen e konfor. Lafanmiy donk i zwe sa rol kle pour asir devlopman zanfan.

“Mon mesaz i spesyalman pour bann paran parske se zot ki responsab pour kalite zot fanmiy. Si lafanmiy i pilye sosyete, se paran ki pilye lafanmiy. Rol paran ozordi in petet vin pli konpleks ki oparavan. Paran i bezwen pli byen ekipe pour fer fas avek bann defi nou lepok. I annan bokou defi me mon ankouraze pour vwar kouraz ki laplipar paran i annan pour asir byennet zot zanfan e lepanouisman zot fanmiy. Si nou reflesir lo nou bann fanmiy Seselwa, nou ava vwar ki nou annan bann diferan kategori fanmiy. Plizyer nou in ganny eleve par nou granparan, menm si nou manman ek papa i ankor vivan. Plizyer i grandi avek zis manman oubyen papa. E i annan osi ki’n grandi avek tantin ou dan lorfelina. Larealite i fer ki souvannfwa sa ki nou apel en fanmiy i plis ki en manman, papa ek ser e frer. Me sa ki tre enportan e ki nou pa devret bliye, se menm si konpozisyon en fanmiy i sanze, rol en fanmiy pa devret zanmen sanze.

“Mon oule konfirm langazman gouvernman anver byennet tou nou bann fanmiy Seselwa.

“Mon salye bann granmanman e bann dimoun ek lenstitisyon ki donn en lakour e en lavi fanmiy bann orfelen. Mon remersye zot pour sa panse ki zot annan pour lezot, pour zot lespri ‘caring and sharing’; en lespri ki ti a bon nou tou nou met an pratik.”

LINKS