Antretan ki lanket entansif i kontinyen pour retrouv bann ki responsab pour sa doub mert ki ti arive pandan wikenn Majoie, lapolis in dir ki zot satisfe avek bon korperasyon ki zot in e pe kontinyen resevwar avek manm piblik.

Dan en intervyou avek lapres Merkredi 15 Zanvye apremidi kot stasyon lapolis santral, Sef Sirentandan André Valmont ti dir ki ziska prezan zot tre satisfe avek lafason ki manm piblik pe korpere pour ed zot dan zot lanket.

Pandan ki bann ekspert pe kontinyen avek travay entansif dan landrwa kot sa 2 mert in ganny konmet, Sef Sirentandan Valmont in dir ki 8 dimoun ki ti'n ganny detenir pour ganny kestyonnen in fini ganny large.

Travay in osi entansifye lo sa pick-up ki ti ganny retrouve dan distrik Mont Fleuri Dimans swar, ki lapolis i sispekte mertriye sa 2 viktim ti'n servi pour sov ladan apre ki zot ti'n fini konmet zot aksyon kriminel. 

Antretan letopsi pour konn lakoz egzakt lanmor sa de viktim pe kontinyen e Sef Sirentandan Valmont in dir ki son rezilta ava ed zot dan zot lanket.

Antretan lapolis pe lans ankor lapel avek nenport dimoun, sirtou bann ki pe reste dan zanmerant kot sa krim ti arive, ki annan okenn lenformasyon ki ava kapab ed zot anmenn sa ki responsab pour sa doub mert devan lazistis pour pa ezite kontakte biro CIU, stasyon lapolis santral.

I ti azoute ki tou lenformasyon i reste konfidansyel.

Sef Sirentandan Valmont in osi profite pour remersye tou bann dimoun ki'n telefonnen pour donn lenformasyon, ki in dekrir koman tre itil dan sa travay ki zot pe fer pour trouv sa ki koupab.

"Nou tre satisfe avek lafason ki zot korpere e nou swete ki zot kontinyen," i ti dir.

Fodre fer rapel ki dan sa lensidan doub mert ki ti arive swa pandan lannwit Sanmdi oubyen Dimans granmaten, de zonm lorizin Endyen – Velayathan Vivekananthan Padayachy, aze 40 an, e Subramaniam Rajathurai Pillai, aze 68 an – ti ganny trouve mor Dimans bomaten dan en lakaz parlao stor Krishna Mart, Majoie, avek blesir lo zot lekor, sirtou dan latet, e zot ti'n ganny garote avek difil elektrik.

LINKS