Lapolis in donn en rapor lo bann nouvo devlopman konsernan plizyer ka vol ki'n arive resaman.

Sa de zonm ki ti pe rimann an koneksyon avek latak ek vol lo Msye Serge Hoareau Sanmdi 10 Zanvye ti reaparet an-kour Zedi 15 Zanvye apremidi. Lakour in ordonnen ki enn ant sa de zonm i ganny large akoz napa ase levidans kont li tandis ki lot in reganny plase an detansyon lapolis ziska Lendi le 19 Zanvye.

Dan en lot devlopman, sa de zonm ki ti ganny arete Beau Vallon an posesyon propriete Casamar Ltd in ganny sarze epi large. Enn in ganny sarze pour vole dan son landrwa travay e lot pour an posesyon propriete vole. Zot zafer ti ekspekte ganny ekoute yer.

Touzour sa semenn, en zonm sorti Praslin ti ganny sarze pour kas lakaz e vole. Son zafer pou ganny ekoute le 23 Fevriye.

Lapolis in osi raporte ki sa de zonm ki ti pe rimann pandan ki lanket pe fer dan plizyer ka kas lakaz e vole ti ekspekte pas an-kour yer. Lapolis in osi note ki plizyer sa bann lobze vole in ganny retrouve dan posesyon sa de zonm.

En lot Pralinwa ti osi ganny sarze letan i ti pas devan lakour Zedi pour kas lakaz e vole, vole dan landrwa travay e sove an detansyon lapolis. Lakour in ordonnen ki i ganny detenir prizon Lil Long ziska son zafer i terminen.

LINKS