Distrik Baie Lazare i ekspekte zouir en nouvo lekol primer ki pou osi enkli en nouvo lakres. Sa proze i ekspekte kout anviron 12.7 milyon roupi.

Sa ti ganny devwale par Minis pour Ledikasyon ek Lazenes, Msye Danny Faure, dan sesyon demann kestyon dan Lasanble Nasyonal, Mardi.

Minis Faure ti pe reponn kestyon Manm Lasanble pour distrik Baie Lazare, Onorab Robert George, lo ki plan son minister pour lekol Baie Lazare ki kondisyon son batiman aktyel pa fer li favorab pour lansenyman ek laprantisaz.

Minis Faure ti dir ki departman ledikasyon i annan plan pour rekonstrir lekol primer Baie Lazare e ekip li avek bann nouvo fasilite avek bi fer li vin lo menm nivo ki bann lezot nouvo lekol primer dan pei.

Minis Faure ti dir ki dan son plan, Minister Ledikasyon i annan lentansyon demolir set (7) vye batiman sa lekol e ranplas zot par trwa (3) nouvo batiman.

I ti eksplike ki ann-adisyon avek bann nouvo konstriksyon, en batiman trwa (3) letaz ki deza ekziste pou ganny renouvle konpletman.  Lorganizasyon bann nouvo striktir, Minis ti dir, ava permet litilizasyon maksimonm lespas ki annan an prenan kont ki sa landrwa i en pe sere.

Sa proze pou osi enkli louvraz lo fason pour amelyor lakour lekol e bann nouvo fasilite tel ki landrwa pour park transpor, semen ek travay "landscaping".

Antretan, Minis Faure in dir ki departman ledikasyon in progranm serten louvraz renovasyon lo sistenm elektrisite, twa batiman ek plafon lasal manze, e i osi annan plan pour ranplas bann "frame louvers", tousala avek bi kre en lanvironnman pli favorab pour bann etidyan ensi ki bann ansennyan kapab travay.

De lezot proze ki sa minister pe al antreprann tre byento i konstriksyon en nouvo lasal manze pour lekol La Digue ki pou kout R75,000 ek enn Silhouette ki ekspekte komanse ankor dan de semenn. Sa proze lo La Digue, ki minis in dir i en priyorite pour sa minister, i ekspekte komanse ver milye sa lannen.

An sa ki konsern plan pour met baraz otour sa lekol, Minis Faure ti dir son minister pe an se moman etidye sa avek bi trouv meyer solisyon ki ava apopriye pour lanvironnman lekol La Digue.

Sa de larepons donnen par Minis Faure ti swivan kestyon Manm Lasanble pour La Digue ek bann zil pros, Onorab Hansley Constance, lo ki priyorite son minister an sa ki konsern renovasyon lasal manze lekol La Digue ek Silhouette e ki plan son minister konsernan plan fencing pour lekol La Digue avek bi amelyor sekirite zanfan e fer ki i ava annan plis kontrol lo sirkilasyon bann etidyan pandan lazournen.

Swivan kestyon Onorab Gerald Julie, Manm Lasanble pour distrik Mont Buxton, lo plan Minister Ledikasyon ek Lazenes pour renovasyon lekol La Rosière, Minis Faure ti dir ki pandan sa dernyen trwa lannen, depi lannen 2000, son minister in tou le lannen esey fer serten louvraz renovasyon lo sa lekol ki'n vye.

Parmi bann travay renovasyon, Minis ti dir ki lannen 2000 en nouvo twa ti ganny mete lo batiman libreri, an 2001 twa sa gran batiman an ros ti ganny sanze konpletman e lannen pase bann "frame" ensi ki "louvers" ki ti manke ti ganny sanze e ranplase.

Pour sa lannen, Minis Faure ti dir ki in progranmen pour fer travay reparasyon lo bann twalet. I ti osi fer remarke ki pandan sa trwa dernyen lannen, travay reparasyon ki'n fer lo lekol La Rosière in kout gouvernman R333,000.

Minis Faure ti profit lokazyon pour eksplike ki son minister i annan en progranm renovasyon pour sak lekol.

Sa i divize an de progranm. Premye i bann louvraz routin ki sak lekol i fer apre ki zot in resevwar en alokasyon avek minister e dezyenm se bann louvraz mazer lo bann batiman.

Antou, minister in depans 4 milyon roupi dan renovasyon bann lekol lannen pase.

LINKS