Koman parti zefor pour reviv bann zwe tradisyonnel, Leritaz Nasyonal an kolaborasyon avek Konsey Nasyonal pour Spor pe organiz en festival apele Lafet Zwe.

Bi sa festival se pour promot bann zwe tradisyonnel osi byen ki ankouraz kreasyon bann nouvo zwe baze lo bann aktivite oubyen senn tradisyonnel.

Lafet Zwe 2004, ki pou deroul le 29 Fevriye Domaine de Val des Pres, Au Cap depi 9.30 bomaten ziska 4.30 apremidi, pou vwar partisipasyon bann zanfan depi laz 7 ziska 15 an sorti dan bann diferan lasosiasyon tel parey NRA, Care, Scouts ek SYAA, parmi lezot. 

Pandan sa lazournen bann zanfan pou ganny sans aprann e pratik en minimonm 18 kalite zwe tel ki plan kare, makonn, zwe bannann, eksetera.

Menm si sa lafet pou vwar partisipasyon zanfan, bann organizater pe osi envit adilt ek sitwayen aze pour zot vin partisipe zot osi vi ki zot ava kapab ganny sans partisip dan bann performans ladans osi byen ki lezot aktivite tradisyonnel tel ki plis koko, rap koko e lezot zwe parey domino ek danm, eksetera.

Lezot aktivite lo progranm pour sa lazournen i en kwiz baze lo bann zwe tradisyonnel e en legzibisyon zouzou ek zwe tradisyonnel.

Pou osi annan loportinite pour gout bann pla kreol tradisyonnel osi byen ki bann pti manzay lokal.

LINKS