Sa bann plan drog ki lafors sekirite in sezi

Lapolis in fer en lasezi plis ki 130 pye kanabis dan leo La Batie (Beau Vallon) ek Enfoncement (Anse Royale) sa semenn.

Sa de lasezi ti fer Lendi le 23 Fevriye, pandan en loperasyon konzwent ant zofisye larme ek zofisye Anti-Drug and Marine Squad (Adams).

Dapre Jean Toussaint, Zofisye Relasyon Piblik kot Lapolis, depi komansman sa mwan lapolis in entansifye zot lalit kont drog e sa ti komans avek en loperasyon lo Praslin le 11 Fevriye kot antou 400 plan kanabis ti ganny dekouver dan leo Consolation ek Fond B'Offay.

Dan sa loperasyon lo Mahe sa semenn, sa lekip ti dekouver 56 pye kanabis ki ti'n matir dan leo La Batie e 80 lezot ti ganny arase dan leo Enfoncement.

Menm apre sa bann dekouvert, Msye Toussaint in dir ki okenn dimoun pa'n ganny arete  lefe ki sa bann plant ti ganny dekouver lo bann popriyete izole ki apartyen a gouvernman.

Msye Toussaint in dir ki lefe ki okenn larestasyon pa'n ganny fer, sa bann egzibit ansanm avek lezot ki zot ka in fini pas devan lakour i ekspekte ganny detri byento.

Portparol lapolis in osi dir ki lapolis ansanm avek Adams pou kontinyen avek zot loperasyon routin e ki sa lafors pou vin pli serye avek bann lofans drog.

Antretan sa zonm Endyen ki an detansyon lapolis apre ki i ti ganny arete Lendi le 23 Fevriye,  lo erport an posesyon serten kantite kanabis i ekspekte pas devan lakour Zedi le 26 Fevriye.

LINKS