Sa lasosiasyon ki regroup bann ekriven Seselwa i sa lannen selebre 20 an depi ki i egziste. Pour mark sa lokazyon, ki annefe tonm Vandredi le 26 Mars, nouvo lasosiasyon bann ekriven Seselwa  - IROGRIF – i ekspekte organiz en seri aktivite ki pou deroul dilon lannen.

Premye aktivite lo progranm sa lasosiasyon i en sware ki pou regroup tou bann ekriven Seselwa menm bann ki pa form parti IROGRIF. Sa aktivite,  ki pou ganny batize La nuit des ecrivains, i ekspekte demar avek en kolok swivi par en prezantasyon diferan morso poenm ek zistwar. Sa sware pou termin avek en dinen.

De lezot aktivite ki sa lasosiasyon pe anvizaze fer i lansman en rekey poenm par bann manm aktyel IROGRIF e osi en edisyon spesyal Voyaz. Voyaz nou a rapel i en sware lapoezi, zistwar ek lezot rakontaz ki form parti selebrasyon Festival Kreol.

Dapre Msye Justin Valentin, tyermenn IROGRIF, bi organiz sa bann aktivite se pour fer piblik Seselwa annan plis lanmour pour literatir e osi promot sa lasosiasyon.

I ti dir ki menm si bokou Seselwa i kontan lir, pa bokou ki ekrir. Alor sa bann aktivite ava ankouraz plis Seselwa pour ekrir plis e osi ekrir bon kalite louvraz.

Msye Valentin ti fer remarke ki depi ler i ti lanse le 26 Mars 1984, sa lasosiasyon ki sa letan ti apel Lasosiasyon Ekriven dan Seychelles (LES), in pas atraver plizyer sanzman e in osi konn bokou moman difisil ensi ki bann bon moman.

Letan nouvo milener ti pe aprose bann manm LES ti deside sanz non sa lasosiasyon pour vin IROGRIF avek bi elev son stati.

Atraver vye ek nouvo lasosiasyon, bokou ekriven Seselwa aktiv in vin devan e zot in reisi ganny serten debousman.

En lot reisit se ki bann ekriven in ganny sans partisip dan tou bann aktivite literer e akademik ki’n ganny organize dan kad Festival Kreol depi 1984.  Msye Valentin ti dir ki zot partisipasyon dan kolok par egzanp in donn dimoun sans reflesir lo literatir Seychelles ek lalang kreol e zot kontribisyon in osi ede anrisir sa lalang.

Ekriven ki form parti sa lasosiasyon in osi atraver Festival Lazenes donn sesyon bann zenn lo literatir Seselwa. Sa lasosiasyon i osi parfwa organiz en lazournen kot zot analiz serten travay kanmarad e, dapre Msye Valentin, sa i ed zot vwar zot febles e aprann nouvo teknik ekrir.

I ti dir ki koman en ekriven zistwar, in limenm ganny plizyer loportinite atraver sa lasosiasyon pour devlop son bann talan e partaz son bann travay avek Seselwa ensi ki etranze pandan plizyer lokazyon.

Msye Valentin ti dir ki letan i ti reprezant bann ekriven Seselwa pandan Jeune Expo 90 ek Festival Conte Joint ki ti fer La Reunion an 1992, i ti ganny sans fer bann Renyonnen apresye literatir Seselwa. An 1999 ti tour bann Morisyen pour konn plis lo literatir Seselwa e sa ti atraver son partisipasyon dan festival Fête Afrique ki ti fer Maurice. Lannen pase sa rakonter zistwar, ki tre ganny apresye par piblik Seselwa, ti osi prezan pour en edisyon Festival Kreol ki ti fer Rodrig.

Parmi bann defi kourt ek lon-term, Msye Valentin ti dir ki IROGRIF i annan bokou pour fer pour promot lasosiasyon parmi bann zenn e osi vwar akoz Seselwa pa kontan ekrir. Zot pou osi rode akoz serten dimoun ki ekrir pa kontan partaz zot louvraz.

« Mon mesaz ki mon anvi pase pour sa lokazyon se pour demann bann ekriven pou pa ekrir zis roman. Me annou diversifye bann stil ekrir. » i ti dir.

Aktyelman IROGRIF i annan anviron en trantenn manm aktiv.

LINKS