Lapolis in raporte ki Mervin Bastienne, en zenn garson 24 an, ti mor Sanmdi le 25 Zanvye, granmaten dan en aksidan lo larout Glacis ki ti enplik sa loto ki i ti pe dray avek en bis SPTC.

Ziska Dimans le 26 Zanvye, pa ti ankor vreman kler ki mannyer aksidan in arive me touzour dapre lapolis sa loto ki sa zenn garson ti pe dray ti en Subaru e i ti sorti dan direksyon Beau Vallon pour al Glacis. Dan sa loto ti osi annan de lezot garson konman pasaze letan sa aksidan ti arive.

An sa ki konsern sa bis SPTC li i ti pe voyaz dan direksyon opoze, setadir sorti lavil pour al dan nor Mahe an pasan par Macabée.

Dapre lapolis letan zot ti ariv landrwa kot aksidan ti'n arive, sa trwa garson dan sa loto ti'n fini ganny transporte lopital. Apard drayver ki'n mor, sa de lezot pasaze ti sibir blesir ki pa tro grav e parmi enn in ganny admet lopital avek en lebra kase.

Sa loto in andomaz konpletman tandis ki sa bis in sibir domaz devan dan son kote drwat.

Sef Sirentandan André Valmont in dir ki lanket pe kontinyen pour determin vre lakoz sa aksidan.

Sa garson ki'n mor ti pe etidye aletranze e i ti isi lo vakans.

Kant a sa drayver bis i annan rapor konmkwa in ganny afekte dan son likou.

Letan i ti pe fer rapel ki sa i premye aksidan fatal ki ganny raporte sa lannen, Sef Sirentandan Valmont in osi lans en lapel pour ki manm piblik i vin pli konsyan letan zot lo semen.

"I malere ki nou'n perdi en zenn dimoun dan en aksidan e lapolis i oule lans en lapel avek bann drayver an zeneral pour pran plis prekosyon lo semen sirtou aswar ek lo granmaten," i ti azoute.

Msye Valmont in osi dir ki lapolis, ansanm avek lotorite transpor lo later, pe sa lannen met bokou lanfaz lo bann dimoun ki fer vites e osi bann ki asiz lo bor pick up avek bi redwir lakantite aksidan lo semen.

En zonm i ganny trouve pann

Lapolis in raporte ki en zonm 40 an, James Benoit, ti ganny trouve pann Sanmdi le 25 Zanvye, bomaten kot ansyen Sato Lanmisyon, La Misère, landrwa kot son manman i travay.

Dapre Asistan Sirentandan pour distrik Mont Fleuri, Jack Valentin, zot ti resevwar en kou-d-telefonn ver 7.40 bomaten e letan zot ti ariv kot sa landrwa James ti ganny trouve anpandan avek en lakord telefonn ki ti'n anmare avek en pye ponm dan zarden deryer sato.

Dapre lapolis, James pa ti en dimoun stab e i ti pe swiv tretman avek lopital Sikyatrik Les Cannelles.

Me dapre son manman, Madanm Mary-Anne Benoit, tou dernyenman James ti dan en leta normal e Sanmdi le 25 Zanvye, bomaten i ti ganny trouve pe fer letour lakaz e plitar ganny dekouver pann.

Lapolis in dir ki letan zot ti ariv lopital dokter ti konfirmen ki James ti'n fini mor.

LINKS