Lamazorite Manm Lasanble Nasyonal ki ti fer zot lentervansyon pandan sesyon travay Zedi le 26 Desanm e Vandredi 27 desanm, ti dir ki zot santi zot tre alez avek propozisyon Bidze 2003 e zot pou alor vot an faver.

Apre ki Lider Lopozisyon, Onorab Wavel Ramkalawan ek Lider Biznes Gouvernman, Onorab Patrick Herminie, ti fer zot ladres, lezot manm ti entervenir e donn zot pwen-d-vi lo propozisyon bidze ki Vis-Prezidan James Michel, ki osi Minis Finans, ti delivre Mardi le 24 Desanm.

Laplipar bann manm ti profit lokazyon pour fer resorti problenm zot distrik e dir dan ki fason sa bidze pour ed zot.

Pour rezon lespas nou pa pou kapab prezant zot lentervansyon tou bann manm me nou pe plito pibliy ekstre lentervansyon selman serten manm toulede kote (parti mazoriter ek lopozisyon). 

Onorab Rukaiya Jumaye, manm proporsyonel dan parti mazoriter (SPPF), ti dir ki sa bidze i tre apropriye e i ekipe pour fer fas avek defi sa 21enm syek. Sa gouvernman dizour, i ti azoute, i tre konsyan bann demann son pep e se pour sa rezon ki in ogmant alokasyon serten minister. I ti dekri Bidze 2003 konman en mekanism ki pa zis pour en lannen me ki pou gid pei dan lefitir.

Manm elekte pour Plaisance, Onorab Ivy Edmond, ti note ki loportinite lanplwa i annan en kantite e fodre ki bann zenn i sezi sa e devlop zot lekor. I ti azoute ki si gouvernman in ogmant alokasyon Minister Lasante se akoz i annan lasante ek byennet son pep a ker. I ti demann avek tou dimoun pou alor fer zot bout e evite gaspiy latizann. I ti osi swete ki Minister Gouvernman Lokal, Spor ek Kiltir i fer otan avek son alokasyon e ki bann proze kominoter dan tou distrik i ogmante.

Kant a manm elekte pour Grand Anse Praslin, Nobert Lepathy, i ti dekri sa bidze koman sa mekanism ki pou anmenn plis devlopman parey lakaz, semen ek fasilite lasante. I ti dir ki loportinite ki sa bidze pe anmennen i telman bokou ki zenn i devret vwar zot kapab pe devlope tel parey dan spor ou pti biznes.

Dapre manm elekte pour Cascade, Onorab Charles de Commarmond, sa bidze i reflekte polisi, prensip ek stratezi gouvernman e i pou anmenn devlopman dan tou distrik.

I ti dir ki personn pa devret pran keksoz alalezer e ki fodre annan plis lefikasite dan sistenm gouvernman e tou dimoun i devret fer son louvraz parey fodre.

Servis lapolis osi fodre aranze pour ki zot vin pli profesyonnel, i ti note, avan azoute ki en nouvo scheme pour bann ners ti neseser me sa i devret agrandi e englob lezot profesyon dan lefitir.

Onorab Dick Esparon, manm elekte pour Pointe Larue, ti dir ki i enposib pour adres tou problenm pei dan en bidze. Me sa ki enportan, i ti dir, se ki a diferan staz, sa bidze i adres progranm sa parti ki'n ganny elekte. I ti dir ki son distrik in benefisye anba bann bidze oparavan e sa enn osi i tous lavi tou dimoun dan kominote tel parey proze lakaz ek semen.

Reprezantan Anse Royale, Onorab Barry Faure li ti rezet tou lakizasyon ki i annan taks lo manze dan pei e i ti siport sa par en lalis pri bann komodite esansyel.

Onorab Simon Gill li ti elabor lo progranm lakaz gouvernman pour sa prosen senk an e dir ki 1,700 lakaz in komans ganny konstrir e ki anba Home Ownership Scheme gouvernman in deza anmas 10 milyon roupi. I ti anplis demanti rapor konmkwa en lotel pou ganny konstrir La Digue dan sa landrwa kot sant lasante i aktyelman sitie. Apre ki sa sant lasante in ganny demoli pour ki en lot nouvo i ganny konstri, i ti fer resorti ki se en sant lazenes, ekipe avek internet, ki pou ganny konstrir dan son plas.

Kant a bann manm lopozisyon ki ti pran laparol, zot ti dir ki si menm sa bidze pou rezourd plizyer problenm, i pa vreman meyer solisyon pour pei.

Onorab Hardy Lucas, manm proporsyonnel, ti souliny detrwa problenm ki i ti dir pa pe ganny rezourd avek sa nouvo bidze e fer resorti ki menm si bokou distrik pou benefisye avek bann gro plan, bann distrik Sid Mahe pa paret pou ganny narnyen.

I ti dir in plis ki ler ki sekter lasante i ganny sa rekognisyon ki i ti merite.

Onorab Nicola Prea, manm elekte pour Bel Ombre, in akey promes gouvernman pour konsilte tou partner pour ede fer lekonomi marse me dir ki lotorite i devret gard son parol safwasi. I ti osi dir ki fodre Seselwa i reganny konfyans dan son sistenm lasante e koumsa bokou zot i ava aret al deor e pran en bon pe porsyon deviz etranzer dan labank.

Manm elekte pour Mont Buxton, Onorab Gérard Julie, ti lans en lapel pour ki tou MNA ek administrater distrik i travay ansanm pour benefis tou dimoun. Si sakenn i bos son kote, i ti azoute, pei pa pou mars parey fodre e se lepep ki perdi. I ti osi demande ki lapolis ek SPTC i sorti dan sa leta ki zot ladan e deservi lepep parey fodre. Tandis ki napa ase bis pour transport pasaze, lapolis li i mank profesyonalism, i ti fer resorti.

Francis Cupidon, manm proporsyonnel, in akey lapel pour dyalog e sa i ti dir pou reprezant en nouvo souf lavi pour pei ki'n deza pas dan tro bokou problenm. I ti dir ki pri kontrol i devret aplik pour tou dimoun e ki fodre annan en rediksyon dan lakantite travayer etranze dan pei. I ti osi dir ki gouvernman i devret vin pli serye avek son progranm lakaz akoz bokou dimoun i ankor pe espere apre bokou lannen.

Kant-a Onorab Regina Alcindor, manm elekte pour Glacis, i ti dir ki sa bidze pa reprezant nanryen nouvo e SPPF pa pe prezant nouvo lide. I ti dir ki ziska prezan napa nouvo envestiser ki'n vin envesti Seychelles e ki sa i montre ki sitiasyon pei pa vreman bon parey pe ganny dir. I ti osi fer lapel pour en bon sistenm pension scheme e dir ki fodre annan pli bon distribisyon deviz etranzer dan labank.

LINKS