Dan en total 181 aplikasyon pour ganny nasyonalite Seselwa an 2002, 131 ladan ti ganny aprouve.

Sa ti ganny devwale par Minis Joseph Belmont, ki ti pe reprezant Minis pour Zafer Entern, pandan sesyon demann kestyon dan Lasanble Nasyonal Mardi 28 Oktob.

Minis ti pe reponn en kestyon par manm elekte pour Bel Ombre Onorab Nicholas Prea, ki ti oule konnen ki kantite aplikasyon pour nasyonalite ti ganny aprouve an 2002.

Dan son larepons, Minis Belmont ti dir ki dan sa 131 aplikasyon, 13 ti ganny aprouve anba lartik 10 Konstitisyon – savedir ki ou otomatikman kalifye pour vin en sitwayen Seselwa par desandans.

In osi annan 48 aplikasyon ki ti ganny aprouve swivan natiralizasyon par maryaz, 35 anba sirkontans spesyal e en lot 35 selon bann kriter Citizenship Act.

Lezot kestyon ki minis ti reponn ti konsern plan pour konstrir en nouvo stasyon lapolis dan distrik Grand Anse Praslin, en kestyon demande par manm elekte sa distrik Onorab Norbert Lepathy.

Dan son larepons minis ti anonse ki i annan plan pour fer en batiman Grand Anse Praslin dan ki zot pou enstal en stasyon lapolis osi byen ki en lapos, en lakour ek libreri.

I ti dir ki en tel demars pour met sa bann diferan lenstitisyon anba en sel twa ava kout gouvernman pli bon marse.

Minis ti tou-d-menm fer resorti ki travay lo sa proze pou enpe an retar anvi bann reform ekonomik ki pei pe antreprann.

Konsernan ki Minister Zafer Entern pe fer pour ranforsi sekirite lo erport ek lo por – en lot kestyon poze par Onorab Prea – Minis Belmont ti asir bann manm lasanble ki tou mezir sekirite i ganny pran dan sa de landrwa prensipal pour asir proteksyon pei.

Pandan sesyon demann kestyon Mardi Minis pour Ladministrasyon ek Devlopman Mendev, Manmzel Noellie Alexander, ti osi prezan pour reponn kestyon demande par Onorab Alain Ste Ange, manm elekte pour Bel Air, konsernan aksyon ki pe ganny pran lo bann travayer servis piblik ki kontinyen asiz lo "file".

Da son larepons minis ti dir ki i en lofans si en travayer servis piblik pa reponn en let notis pou fer sa resipyan konnen pou dir in resevwar son let. I ti azoute ki i pe fer tou pou amelyor servis piblik anvi ki konplent in deza ganny fer oparavan lo sa size.

LINKS