Konferans-de-pres Vandredi le 31 Oktob, ti en lokazyon pour Madanm Pool fer en bilan 18enm edisyon Festival Kreol

Konpare avek tou le lannen kot Festival Kreol in benefisye atraver en bidze gouvernman e kontribisyon plizyer donater, en komite i ekspekte ganny lanse boner lannen prosenn pour konmans ranmas fon pour 19enm edisyon sa festival.

Sa ti anonse par Tyermenn Komite Festival Kreol Madanm Sylvette Pool, ki osi Minis pour Gouvernman Lokal, Spor e Kiltir, dan en konferans-de-pres Vandredi le 31 Oktob, bomaten dan batiman Konsey Nasyonal pour Lar.

Pandan sa rankont avek medya, dan prezans Minis pour Lar e Kiltir Morisyen, Msye Motée Ramdass, ensi ki lezot manm Komite Festival Kreol, Madanm Pool i ti fer en bilan 18enm edisyon Festival Kreol.

Madanm Pool ti eksplike ki mwens larzan ki labitid in ganny ranmase pour Festival Kreol sa lannen akoz plizyer donater ki abitye kontribye anver sa manifestasyon kiltirel in prefere donn zot sipor finansyel gran levennman sportif Zwe de Zil.

Sepandan Madanm Pool ti dir ki pandan sa festival zot in fer en zefor pour kontrol bann depans ki ganny fer e ranmas enpe larzan atraver bann lavant, avek bi esey kre en fon permanan ki a ede dan lorganizasyon Festival Kreol 2004.

"Olye esper zis gouvernman pour donn nou larzan e tap laport bann biznes dan sekter prive..., nou pou form en komite ki pou lev fon atraver bann gran aktivite," Madanm Pool ti dir.

Apre en revi ki sipoze ganny fer alafen sa festival, Madanm Pool ti dir zot pou dan en pli bon pozisyon pour deside lo ki lanpler e dan ki fason Festival Kreol 2004 pou ganny fer. Madanm Pool ti fer resorti ki in ariv ler pour revwar enpe lakantite e lafason ki bann aktivite i deroule e deside si 19enm edisyon Festival Kreol pou ganny fer avek mwens lanpler, an preparasyon pour en pli gran manifestasyon pour selebre 20enm lanniverser Festival Kreol an 2005.

Madanm Pool in lans en lapel avek manm piblik ek bann lorganizasyon ki enterese pour vin devan avek okenn propozisyon ki zot annan lo lafason ki bann aktivite i ganny organize. Zot kapab kontakte Sekretaryat Festival Kreol ki baze dan batiman Konsey Nasyonal pour Lar obor Stad Popiler oubyen anvoy zot sizesyon lo ladres kreolfst@seychelles.net

Madanm Pool ti dir ki partisipasyon manm piblik dan Festival Kreol i kontinyen ogmante sak lannen. Annefe dapre li sa lannen in enn kot partisipasyon piblik in a en tre o nivo e lepep Seselwa in vreman mobilize pour donn sa festival son vre valer. 

Madanm Pool in fer remarke ki apard bann aktivite anyel sa festival, komite in osi resanti sipor de la par bann minister, lorganizasyon prive e non-gouvernmantal ki'n ralye zot bann staf pour organiz bann aktivite dan kad sa festival. Sa, Madanm Pool ti dir, in osi ede anmenn ansanm bann zenn e dimoun pli aze.

Madanm Pool ti osi annan en lapresiasyon spesyal pour bann Pralinwa e Digwa ki i ti dir in demontre zot Kreolite atraver plizyer manifestasyon kiltirel ki'n ganny organize lo sa de zil. 

" Atraver son komite, Praslin in sa lannen zwe en rol bokou pli aktiv kot in annan bann aktivite ki'n vreman anmenn partisipasyon en kantite dimoun e menm bann dimoun ki ase aze ki pa abitye sorti in ganny sa sans anmiz zot lekor," Madanm Pool ti dir.

Menm si in annan bann aktivite vize ver bann touris parey kot Berçeau des Artistes, Au Cap, Madanm Pool ti dir ki pour festival lannen prosenn, komite pou entansifye zefor pour ganny plis partisipasyon bann lotel ek lendistri touris an zeneral.

Minis Ramdass, ki'n partisip dan Festival Kreol pandan sa de trwa dernyen lannen, ti osi profite pour partaz son remersiman e gratitid senser anver Komite Festival Kreol.

LINKS