"In ariv ler pour tou Seselwa met zot diferans dekote e travay ansanm pour rod fason amelyor degradasyon ki'n annan dan bann bon valer moral."

Sa ti mesaz laplipar bann manm dan Lasanble Nasyonal ki ti pran laparol Mardi 2 Mars pour donn zot reaksyon lo diskour Leta Lanasyon ki Prezidan France Albert Rene ti fer Mardi 24 Fevriye.

Parmi bann manm ki ti donn zot reaksyon ti Onorab Collin Dyer, Giovanna Charles, Norbert Lepathy, Regina Alcindor, Hansley Constance, Waven William, Walter Confait, Louis Gopal, Ralph Agrippine ek Bernard Georges.

Dan zot lentervansyon bann manm parti mazoriter ti dir ki Prezidan Rene in annan bon rezon pour deklar 2004 koman Lannen Renesans Moral lefe ki avek bann devlopman ekonomik dan pei in osi annan en degradasyon dan bann bon valer moral e la in ariv ler pour pep Seselwa reenkilke dan zot sa bann bon valer imen.

Alor zot in lans lapel pour ki sak endividi i revwar sa bann bon valer imen "ki nou ti annan ki'n ed nou anmenn sa sosyete kot i ete ozordi".

Tou bann manm parti mazoriter ki ti pran laparol ti osi retras bann devlopman sosyal kiswa dan lozman, sistenm lasante ek ledikasyon ek lezot progre ki Seychelles in pas atraver anba dirizan Prezidan Rene. Zot ti dir ki sa bann transformasyon in benefisye tou kous nou popilasyon e non pa selman en serten group.

Zot ti dir ki tou sa bann devlopman in ganny fer e pou kontinyen ganny fer pour devlopman byennet tou Seselwa.

Parey son bann koleg dan parti lopozisyon, Onorab Regina Alcindor ti a son tour dir ki sa diskour pa'n koz lo vre leta lanasyon me in plito retir latansyon lepep lo sa ki pe vreman arive.

Dapre li sa Progranm Reform Makro-Ekonomik “ki ti pou swadizan redres lekonomi pei pe okontrer anmenn bokou soufrans pour pep Seselwa sirtou atraver lentrodiksyon GST”. I ti dir ki  sa bann difikilte ekonomik parey mank deviz etranzer ek mank nesesite debaz dan laboutik e dan lezot servis piblik parey lasante i an rezilta move gouvernans ek koripsyon. E sa, dapre Onorab Alcindor, pe osi ede pour degrad moral sosyete Seselwa.

Sa sesyon Mardi  ti osi konklir deba lo diskour Leta Lanasyon.

LINKS