Fon Lanmal, enn bann aktivite anyel lo kalandriye Festival Kreol, in ankor enn fwa en gran sikse sa lannen.

Sa aktivite, ki ti fer Merkredi 29 Oktob aswar kot restoran Vye Marmi, Au Cap ti atir en gran nonm spektater.

Pandan sa sware, Lucina Esther, Samia Mussard ek Denise Camille ti ganny deklare gran gannyan konpetisyon zenn stilis pour sa lannen.

Sa trwa etidyan Kolez Lar ti prezant en koleksyon lenz fer avek latwal ekri anba tenm koko, ideal pour bann lokazyon aswar e osi pour al lo lans.

Sa trio ti resevwar zot pri avek Madanm Sylvette Pool, Minis pour Gouvernman Lokal, Spor ek Kiltir e osi Msye Jocelyn Ah-Yu, direkter Mauritius Commerial Bank (MBC).

Fon Lanmal i ganny organize avek bi fer manm piblik dekouver e apresye kreativite bann zenn stilis.

Sa konpetisyon ti vwar partisipasyon en kenzenn stilis ki ti enpresyonn lafoul avek zot bann kreasyon.

Dezyenm pri sa konpetisyon ti al pour Gemma Dubel ek Christelle Dingwell ki ti prezant en koleksyon lenz pour bann aktivite lannwit avek tenm dife. Sete Minis Pool ki ti prezant li avek son pri.

Lafoli volan ti tenm en koleksyon lenz ki ti reflekte lafyerte ek zwa-de-viv en Kreol, en kreasyon Gess Pothin ki ti fer li ranport trwazyenm plas. Son pri ti ganny prezante par Madanm Raymonde Onezime, direkter divizyon Kiltir.

Parmi lezot paritisipan ti Christelle Nancy ek Lionel Talma avek en seleksyon lenz saten anba tenm lape ki ti ilistre en lemonn fantezi tandis ki Veronica Mussard, Tracy Radegonde, Maria Gomme ek Vanessa Jouaneau ti prezant en koleksyon lenz diswar avek tenm Vev.

Zenn stilis Beguitta Naiken ti mont en seleksyon lenz saten ek lez ki reprezant sa pyer presye pink sapphire.

Sa defile ti sanz dimansyon letan bann pti model ti prezant koleksyon lenz fer par Jane Sinon. Sa koleksyon lenz borlanmer pour zanfan anba tenm Soley Kreol ti osi enkli lezot akseswar parey sak ek savat.

Telly's Agency ensi ki zenn stilis Sanny Hoareau osi ti la avek zot koleksyon.

Zalantour restoran Vye Marmit ti rezonnen avek laplodisman letan bann gro madanm ti mont lo catwalk pour montre en koleksyon spesyal pour bann gro diomun fer par Emmanuel D'Offay. Sa koleksyon ti enkli rob, zip ek kor e osi lezot lenz diswar.

Moman for sa sware ti letan envite stilis Gwadeloupeen Dominique Virassamy ti prezant en koleksyon lenz fer avek latwal madras. I ti prezant en varyete lenz tradisyonnel son pei ki i ti'n osi azout serten laspe modern avek.

Dominique Virassamy, ki annan bokou potansyel artistik, in dir ki i tre enpresyonnen par koleksyon bann stilis Seselwa. I ti dir ki zot annan bokou talan e son lanbisyon se pour fer en lesanz ant le de pei dan sa domenn.

Pandan Fon Lanmal bann enstrikter Kolez Lar ti osi prezant en koleksyon lenz diswar avek karakteristik lannwit e en lot avek non "Sporty casual" ki ti enkli bann lenz pour pratik sport parey tenis.

LINKS