Lider Lopozisyon Msye Wavel Ramkalawan in lans en lapel avek bann zenn pour zot pran lansennyman koman en karyer.

Sa i vin atraver mesaz ki Msye Ramkalawan in anvoye alokazyon Lazournen bann Ansenyan le 5 Oktob.

Dan son mesaz, Msye Ramkalawan i fer remarke ki nou tou, a en moman ou en lot, nou’n pas devan en ansenyan e se gras a zot devlopman ek zot abilite pour pas konesans ki ozordi nou sa ki nou ete dan sosyete.

"I toutafe zis si ozordi, anmezir ki nou pe eksprim nou remersiman ek rekonesans, ki mon lans en nouvo lapel avek tou bann paran ek etidyan pour montre en pli gran rekonesans anver sa group travayer dan nou sosyete.  Annou apresye pli byen zot travay e annou donn zot sa sipor ki zot merite," Msye Ramkalawan i dir dan son mesaz.

"Mon osi profite pour lans en lapel avek plis zenn Seselwa pour zwenn sa profesyon nob afen ki nou ava ganny ase ansenyan Seselwa pour nou bann zanfan.  En mo lankourazman i al spesyalman pour bann zenn ki pe fer zot letid kot NIE," mesaz Lider Lopozisyon i azoute.

Pour terminen, Msye Ramkalawan i remersye tou bann ansenyan ki’n pran zot retret pour zot bann lannen devosyon ek zot travay dir.

LINKS