Zenn i donn Kouvan Ste Elizabeth en nouvo vizaz

En dizenn zenn fiy ek garson ekipe avek penso ek lezot zouti ti zwenn ansanm pandan en demi zournen Sanmdi 3 Avril pour donn Kouvan Ste Elizabeth en nouvo vizaz.

Sa bann zenn, ki’n deza partisip dan Ship for World Youth Programme e ki form parti en nouvo lasosiasyon apele Seychelles Alumni Association, ti antreprann diferan travay volonter ki ti enkli penn bann dortwar zanfan ensi ki kot bann dimoun aze i reste e osi bann miray an deor batiman sa kouvan. Apre ki zot ti’n fini penn, sa bann zenn ti osi fer serten pti louvraz dan zarden.

Sa i kontribisyon oubyen sakrifis sa lasosiasyon pandan sa letan karenm.

Tou bann lekipman ki ti pe ganny servi sa zour ti kontribisyon fer par Oceana Fisheries e osi larzan ranmase pandan bann aktivite ki sa laosisasyon in deza organize.

Apremidi ti ganny rezerve pour detann avek bann zanfan sa kouvan atraver plizyer aktivite lwazir parey ronn ek foutbol.

Sa bann volonter ti termin sa lazournen avek en barbecue lo lans.

Dapre kordinater bann aktivite sa lasosiasyon, Jules Hoareau, i dan plan pour zot adopte sa kouvan koman en landrwa kot zot pou souvan vin fer bann diferan travay volonter.

I ti dir ki zot anvi entansifye zot travay e al ver bann lezot orfelina parey Foyer de Nazareth.

Sa lasosiasyon ki regroup en ventenn zenn ki’n deza partisip dan Ship for World Youth Programme i osi fer bann lezot aktivite avek bi lev fon pour zot lasosiasyon.

Msye Hoareau in dir ki zot annan nide ankouraz lezot zenn pour zwenn zot e ki dan lavenir partisipasyon bann zenn dan bann aktivite parey pou ganny servi koman en kriter pour partisipasyon dan Ship for World Youth Programme.

LINKS