Lapolis in dir ki zot satisfe avek konportman piblik pandan peryod Nwel ek lannen e in felisit zot pour zot bon korperasyon.

Sa ti ganny fer resorti par Zofisye Relasyon Piblik dan Lapolis, Msye Jean Toussaint, letan i ti pe donn en bilan bann lensidan ki'n arive pandan sa peryod.

An sa ki konsern aksidan trafik, Msye Toussaint in dir ki konpare avek bann lannen avan, mwens ka ti ganny raporte e okenn ka fatal pa'n ganny rikorde pandan sa dernyen peryod festivite.

Malgre lapli selman 24 aksidan miner ti ganny raporte - 16 ka ti ariv ant le 23 ek le 29 Desanm e 8 ka ti ganny raporte ant le 30 Desanm ek le 3 Zanvye.

Lo kote lensidan trazik, trwa ka ti ganny rikorde: premye ti le 28 Desanm ler zot ti ranmas lekor Msye Bernard Alphonse dan leo Les Cannelles; dezyenm ka ti en garson 26 an, Nelson Finesse, ki ti ganny trouve pann Ma Constance le 1 Zanvye e trwazyenm ka i konsern lekor Msye Jacob Delorie ki ti ganny ranmase pe flote dan lanmer Machabée le 3 Zanvye.

Msye Toussaint ti osi azoute ki ti annan serten ka vyolans domestik kot fanmiy ti pe lager antre kanmarad pandan lafet lannen e larestasyon ti bezwen ganny fer pour met lape.

En dizenn ka bandisite in osi ganny raporte kot lakaz ek loto in ganny kase e lensidan vol in ganny konmet. Parmi bann lobze vole i set lanmizik, boutey bwar, bizou, telefonn mobil, set televizyon ek larzan.

Dapre Msye Toussaint i annan dimoun ki an detansyon lapolis an koneksyon avek sa bann aksyon vandalizm ek vol.

Msye Toussaint in fer remarke ki lefe ki lapolis ti'n ranforsi zot patrol pandan sa peryod lafet in ede pour redwir bann aksidan lo semen ek lezot bandisite dan pei.

Lapolis in remersye manm piblik pour zot korperasyon e swete ki sa lannen zot a kontinyen pran zot responsabilite lo semen e respekte lalwa trafik dan zefor pour redwir aksidan.

LINKS