Bann manm dan Lasanble Nasyonal ki ti fer zot lentervansyon lo propozisyon Bidze 2004 Zedi le 4 Desanm,  ti dir ki zot pou donn tou zot sipor gouvernman dan son demars pour anmenn reform dan servis piblik.

Bann manm ti pe koz zis apre ki Lider Lopozisyon Wavel Ramkalawan e Lider Biznes Gouvernman dan Lasanble, Patrick Herminie ti'n donn zot reaksyon lo sa bidze ki ti ganny prezante Mardi le 2 Desanm,  par Vis-Prezidan James Michel dan son kapasite koman Minis pour Finans.

Bann manm parti mazoriter ki ti pran laparol – notaman Onorab Shelton Jolicoeur, Onorab Louis Gopal ki MNA pour Mont Fleuri, Onorab Giovana Charles (Roche Caiman), Onorab Charles de Comarmond (Cascade), Onorab Daisy Rath (Au Cap) e Onorab Rukaiya Jumaye – ti dir ki zot siport sa bidze akoz i enn ki pou ede anmenn plis prosperite pour pei.

Bann manm dan Lopozisyon enkli Onorab Francis Cupidon, Onorab Alain St Ange, ki MNA pour Bel Air e Onorab Nicholas Prea pour Bel Ombre ti koz kont sa bidze ki zot ti dir pa'n donn lendikasyon lo ki mannyer pour ogmant prodiktivite bann biznes pour anmenn plis dolar dan lekonomi pei.

Malgre plizyer zefor ki gouvernman in fer atraver son legzerzis visioning pandan sa de trwa dernyen lannen pour amelyor servis piblik, Onorab Charles ti dir i paret ki i annan serten group dimoun ki pe fer tou pour donn lenpresyon ki napa lefikasite dan sa sekter e sa pe ede pour kre bokou fristrasyon parmi manm piblik. I ti dir ki in plis ki ler pour annan en revizyon tre profon dan sa sekter e retir tou bann ki pa prodiktiv e ki pe soutir gaspiyaz e travay inefikas.

Lo son kote Onorab de Comarmond ti dir dapre li avek en rediksyon dan lakantite travayer, sekter piblik pou fonksyonn avek plis efikasite e lepep ava ganny servi pli byen. Onorab Gopal ti dir ki avek restriktirasyon dan servis piblik bann travayer ava trouv lezot debousman dan sekter prive kot zot a ede ogmant prodiktivite dan lekonomi. Sa restriktirasyon, i ti dir, i anliny avek plan gouvernman pour koup lo depans e ogmant reveni.

Onorab Cupidon ti dir ki an prensip reform dan servis piblik a ede elimin koripsyon, me i ti azoute ki en tel demars par gouvernman fodre pa ki i agrav sitiasyon mank lanplwa dan pei, vi ki dapre li sekter prive osi pe eksperyans serten difikilte akoz i annan mwens aktivite ekonomik.

Onorab St Ange lo son kote ti dir ki sa bidze pa pe ofer nanryen pour soulaz bann difikilte ki lendistri touris pe fer fas avek, vi ki Vis-Prezidan Michel pa'n dir gran keksoz lo la dan son prezantasyon.

Bann manm dan parti mazoriter ti dir ki sa bidze in rekonnet difikilte ki popilasyon pe fer fas avek, me ki atraver bann mezir ekonomik ki pe ganny enplimante depi sa dernyen sis mwan, sitiasyon pou gradyelman amelyore e Seselwa pou vwar ki sa bann sakrifis ki zot in fer i vo lapenn.

LINKS