En lavaler 8.4 milyon roupi domaz ti okazyonnen par dega tel ki dife, dezas natirel ek aksidan lannen pase.

Sa ti ganny devwale par Asistan Sirentandan Brigad Tenny Dife, Msye André Morel, Mardi bomaten kot stasyon Tenny Dife, letan i ti pe donn en bilan lo statistik dezas ek domaz ki'n ganny rikorde pandan lannen 2002.

Antou 372 ka dife ti ganny raporte lannen pase, 35 ka anplis ki lannen 2001.

Dan sa 372 ka dife, in annan 41 lensidan dife batiman, 13 ki ti pran dan bann transpor e 40 lensidan dife brousay. Enn de lensidan dife in osi arive dan bann bato e pandan lenstalasyon elektrisite dan lakaz ek batiman.

Nonm dife dan bann batiman in ogmante sorti 25 lannen 2001 pou vin 41 lannen pase. Fodre fer remarke ki kou domaz dife batiman ki lannen pase ti ariv R6,707,800 i pli o ki larestan domaz ki ti rikorde pandan menm lannen. Laplipar ka dife batiman ti ganny raporte pandan mwan Zen ek Desanm tandis ki mwan Out ti rikord plis dife brousay.

Apard bann lasistans pour ede konbat dife swa dan batiman, transpor, bato ou brousay, Brigad Tenny Dife in ankor enn fwa vwar zot pe ede dan diferan sirkonstans aksidan lo semen oubyen menm dan bann ka dezas natirel.

Mwan Zanvye ek Septanm ti de mwan sarze pour sa seksyon kot son bann zofisye ti ganny deplwaye pour ede dan plis ki en santenn ka pandan bann letan dezas.

Dapre Asistan Sirentandan Morel, laplipar dife batiman in ganny mete par neglizans, aksidan e zot menm annan soupson konsernan serten ka ki dapre zot lenvestigasyon in kapab ganny mete par ekspre.

Parey pandan lannen 2000, ankor enn fwa lannen pase bann ka dife pli grav ti ariv lo Praslin e sa ti kot de lotel. Premye ka ti an Fevriye kot Lotel Village du Pêcheur e dezyenm ti an Me kan dife ti detri konpletman laundry ek lasal lakoutir lotel Coco-de-Mer.

Lo Mahe, bokou ava mazin sa dife ki ti detri konpletman diskotek Flamboyant an Mars.

Malgre in annan en logmantasyon dan lakantite ka dife ki'n ganny raporte lannen pase, Asistan Sirentandan Morel in dir ki i satisfe avek travay ki son seksyon in fer menm si zot in rankontre plizyer difikilte.

I ti mansyonn lefe ki ti napa akse konvenab pour zot transpor ariv dan bann landrwa kot dife ti pe pran e osi en mank akse avek delo.

Lo kote lekipman ek mendev, Msye Morel in dir ki sa in en fakter ki'n anpes zot fer zot louvraz avek plis efikasite.

Lannen pase, Brigad Tenny Dife ti reponn 372 lapel dan bann ka dirzans konpare avek 337 ka an 2001, e parmi ti osi annan 9 ka fos alert (false calls). Fodre fer remarke ki la kantite fos alert in redwir sorti 33 an 2001.

Dapre Asistan Sirentandan Morel sa bann fos alert i retard lefikasite bann travayer brigad tenny dife, sirtou letan i annan en vre sitiasyon dife dan en lot landrwa o-menm moman.

"Mon pe demann manm piblik pour servi sa servis dirzans en pe pli byen. Rod lasistans letan zot vreman bezwen e pa abiz sa servis," i ti eksplike.

Msye Morel ti fer remarke ki parey bann lannen avan, lannen pase zot in kontinyen avek zot travay lo prevansyon e osi fason pour edik bann travayer dan diferan letablisman lo bann teknik debaz pour konbat dife.

Seksyon prevansyon dan Brigad Tenny Dife in osi enspekte sistenm prevansyon dan plizyer batiman atraver pei e re-egzamin bann plan pour konstriksyon bann batiman pou donn lendikasyon lo bann landrwa apropriye kot fodre enstal bann lekipman pour konbat dife, parey bann fire extinguishers.

LINKS