Bann gannyan konkour zenn artis kreolofonn, lanse pandan Festival Kreol 2003, ti resewar zot pri pandan en pti seremoni ki ti fer resaman.

Marsha Dine sorti lekol Kolez Lar in ranport Gran Pri R1500 sa konkour avek son portre titre Tann Zozet.  

Marsha, aze selman 17 an, i en etidyan premye lannen Kolez Lar ki pe etidye lapentir. I ti dir ki i pa ti pe ekspekte ranport sa pri.   

Dan kad pri spesyal ti annan de lezot pri: Reshna Jeanne sorti lekol Cascade in resevwar R1000 koman Pri Spesyal Lankourazman e Pri Special Ziri R500 in ranporte par Steven Rosaline sorti lekol Anse Boileau.

Sa konpetisyon, ki en levennman anyel, ti ouver pour bann zenn aze ant 7 a 21 an sorti dan tou pei kreolofonn. Sa lannen selman Maurice andeor Seychelles ki'n partisipe. E fodre fer remarke osi ki tou pri in ranporte par bann partisipan Seselwa.

Konpetisyon ti osi divize dan kat lezot kategori e dan sak kategori ti annan trwa pri palm - lor, larzan, ek bronz.

Dan Kategori A, Wagne Adeline (Anse Etoile) in ranport palm bronz, Kevin Miunde Maitha (La Rosiere) e Wagne Adeline (Anse Etoile) ti ranport palm larzan e Jean Raoudy (La Rosiere) ti pran palm lor.

Lot trwa gannyan ti dan Kategori B kot palm bronz ti al pour Isabelle Joubert (Takamaka) e Varka Servina (La Retraite). Hendrick Sinon (Cascade) in ranport palm larzan e palm lor in al pour Anifa Mondon (Takamaka).                       

Dan Kategori C tou le trwa gannyan ti sorti Anse Boileau - palm bronz ti al pour Bruno Servina, palm larzan in ranporte par Meryl Alissop e Jim Samson ti ranport palm lor.

Kolez Lar ti antyerman domin Kategori D  kot Juliette Zelime ti ranport palm bronz, palm larzan ti al pour Chantal Colin e Raissa Libanotis ti ranport palm lor. 

Manm ziri pour sa konpetisyon ti konpri diferan reprezantan sorti dan bann pei L'Océan Indien tel ki Maurice, Réunion enkli Seychelles.

LINKS