A lokazyon lafet bann lanmoure Komite Lazenes Fron Progresis Pep Seychelles (SPPF) pe organiz en sware romantik Sanmdi le 14 Fevriye dan larantre Sant Konferans Enternasyonal (ICCS), apartir 7.30 aswar.

Pandan sa sware, ki pou enkli dinen avek bann pla tre enteresan, pou osi annan en performans tre tre spesyal par santer popiler Patrick Victor.

Patrick, ki tre koni pour son repertwar romantik i ekspekte perform zwe morso santimal ki pou sirman tous leker bann lanmoure.

Pour gard sa lanbyans ek latmosfer romantik tou dilon sa sware, larantre ICCS pour ganny en dekor spesyal.

Plitar dan lasware pou osi annan tiraz raffle kot bann ki sanse sa swar a kapab ganny bann pri enteresan parey dinen pour de dan en restoran, parmi lezot.

Sa sware pou osi ranpli avek sirpriz.

Sa aktivite, ki pou osi donn sans bann zenn zwenn avek bann lider sa parti, i premye ki nouvo Komite Lazenes SPPF i organize pour sa lannen.

Tiket pour sa sware, ki pou swiv par en disko ziska granmaten, i kout 125 roupi e i anvant kot Maison du Peuple.

LINKS