Sa drayver taksi ki lapolis ti arete semenn pase apre ki i ti'n vol larzan en kliyan etranze, ti reaparet devan lakour Lendi apremidi (12 Zanvye), e ziz in ordonnen ki i reste an detansyon lapolis pour ankor 14 zour.

Nou ava rapel ki sa drayver taksi, ki reste Pointe Larue, ti servi en kouto pour vol 7 mil roupi lo en kliyan etranze. Sa lensidan ti ariv Plaisance ver 5er apremidi Zedi le 8 Zanvye.

Sa drayver taksi ti aparet ankour pour premye fwa Vandredi bomaten (9 Zanvye), e i ti ganny plase an detansyon lapolis ziska Lendi.

Dan en lot lensidan separe, sa de zonm ki ti atak e vol R15,000 lo Msye Serge Hoareau Sanmdi le 10 Zanvye, ti aparet devan lakour Lendi,  e zot in ganny plase an detansyon lapolis ziska le 15 Zanvye kan zot pou reaparet devan lakour.

Lapolis in osi anonse ki zot in aret 2 zonm Beau Vallon Lendi bomaten apre ki zot ti an posesyon propriyete ki apartyen a Casamar Ltd. Zot ekspekte pas ankour Mardi bomaten (13 Zanvye).

En lot zenn-onm sorti sid Mahe ti osi aparet ankour Lendi kot i ti ganny sarze pour vole dan en magazen Anse Royale. Son zafer pou ganny ekoute le 18 Fevriye.

De lezot zonm pe ganny detenir kordgard santral pandan ki lanket pe fer dan plizyer ka kas lakaz e vole. Fodre fer remarke ki plizyer sa bann lobze vole in ganny trouve dan zot posesyon.

En lot zonm sorti Praslin in osi aparet devan lakour Lendi pour kas lakaz e vole. Li osi i an detansyon lapolis ziska Mardi apremidi kan i ekspekte reaparet ankour kot i sipoze ganny sarze.

LINKS