"Senser pour Sesel" i tenm anba ki Seychelles National Party (SNP) ti organiz son konvansyon anyel Dimans apremidi (12 Oktob), dan Sant Konferans Enternasyonal.

Dan son diskour pour sa lokazyon Lider SNP, Msye Wavel Ramkalawan, ti fer resorti ki son parti in touzour annan sa lespri transparans e demokratik.

"Nou kwar ki nou manm i bezwen konnen dan ki direksyon nou parti pe ale, me i osi enportan pour nou kapab ansanm tonm dakor lo sa direksyon e pran desizyon neseser," Msye Ramkalawan ti dir.

Dan son diskour Msye Ramkalawan ti osi koz lo nesesite annan en transformasyon dan serten lenstitisyon dan pei tel ki sistenm zidisyer ek lapolis.

Lo size zidisyer Msye Ramkalawan ti dir ki i neseser annan en sistenm zidisyer "ki endepandan, efikas e dan ki dimoun i annan konfyans".

"Nou bezwen annan en sistenm zidisyer ki regard merit en 'case' e rann lazistis nou pep..." Msye Ramkalawan ti dir.

An sa ki konsern lapolis, Msye Ramkalawan ti dir ki i neseser annan en re-organizasyon ladministrasyon ek loperasyon lafors lapolis.

I ti azoute ki tou dimoun ki travay dan lafors lapolis i merit annan sa lespri ki zot la konman en serviter tou dimoun.

"Fodre ki lapolis i vin efektiv dan fer zot travay tou an respektan dignite sak sitwayen ... Sa konsep vin zanmi olye lennmi lepep i bezwen ganny sa posibilite pour grandi e etabli li dan okenn dimoun ki pran sa karyer," i ti dir.

Dan son diskour Msye Ramkalawan ti osi donn son pwen-d-vi lo sitiasyon ekonomik dan pei. I ti koz lo nesesite liberaliz lekonomi me anmenmtan fer resorti ki fodre annan sa posibilite pour ki tou dimoun i annan sans partisipe dan sa prosesis.

Lezot size ki Msye Ramkalawan ti aborde dan son diskour i pri bann komodite esansyel tel ki manze, en sistenm medya ki enparsyal, lazenes, parmi lezot ankor.

Pandan konvansyon trezorye sa parti, Madanm Annette George, ti osi prezant rapor finansyel ki ti enkli bann depans e reveni parti. Sa ti swiv par lapwentman en nouvo oditer pour sa lannen ki S&M Associates anba direktiv Msye Freddy Savy.

Parey tou le lannen konvansyon ti osi konsider bann sizesyon e konsern bann siporter parti atraver bann sesyon deba, baze lo bann size tel ki lanplwa, pri lavi e sistenm sekirite.

Sak deba ti swiv par laprouvasyon en rezolisyon, vote alinanimite par bann siporter prezan.

Premye rezolisyon met devan par en manm sa parti dan distrik Au Cap ti koz lo sekirite dan pei vizavi bann lensidan krim ek vyolans. Sa ti apre swiv par en rezolisyon ki demande ki i annan en progranm reform dan lafors lapolis e sekirite dan pei e osi en progranm reabilitasyon dan sistenm prizon.

Dezyenmman konvansyon ti debat lo size lalwa osi byen ki nesesite annan en sistenm zidisyer ki enparsyal. Sa pwen ti ganny met devan par en reprezantan Praslin e ti osi ganny aksepte konman enn bann rezolisyon sa parti.

En manm sa parti sorti dan distrik Port Glaud ti ouver deba lo size mank lanplwa e bann kondisyon apropriye ki a ankouraz bann biznes e anretour ogmant kreasyon lanplwa dirab pou lazenes.

Pandan sa konvansyon lider parti ti osi reponn kestyon bann siporter lo lezot size an deor bann rezolisyon, tel ki pansyon, gratite, mank latizann e prosen eleksyon.

LINKS