Torti-d-mer i ganny trouve anmare lo lans    

Sa torti-d-mer zis avan i ti al ganny large dan lanmer zedi  bomaten

En torti-d-mer ti ganny trouve ver 11 diswar Merkredi le 21 Me, lo en lans Bel Ombre, anmare avek en lakord par son lapat devan.

Dapre direkter seksyon konservasyon dan Minister Lanvironnman ek Resours Natirel, Selby Remy, zot ti ganny alerte par lapolis lo sa lensidan apre ki en manm piblik ti’n enform zot ki i ti’n vwar detrwa dimoun pe trenn en keksoz lo lans.

Ler i ti al pli pre, sa dimoun ti vwar ki sete en torti ki ti pe ganny trennen ater. Deswit i ti notifye lapolis, ki ti kontakte lanvironnman.

Msye Remy ti azoute ki sa torti, en femel ki mezir 1.12 met longer e 1.05 met larzer, pa ti dan tro bon kondisyon akoz son lapat devan ti’n ganny anmare tre sere avek sa lakord.

«Menm apre ki nou’n delarg sa lakord, nou ti vwar ki sa zannimo pa ti kapab tro bouz son lapat devan. Ti osi annan en trou dan son likou e obor sa trou ti’n anflanmen, ki ti pe anpes son latet bouz byen,» Msye Remy ti eksplike.

Se a sa moman ki bann zofisye lanvironnman ti pran desizyon pour pa larg sa torti deswit akoz ti annan posibilite ki i ti a senpleman retourn lo lans ouswa petet lannmen bomaten i ti ava ankor pe flote e en dimoun ti a kapab touy li.

Alor bann zofisye ti anmenn sa torti kot botanik pour les li rekipere e permet sirkilasyon disan dan son lekor byen repran. I ti ganny large yer bomaten, anba sipervizyon bann zofisye pour fer sir ki i retourn dan lanmer sen e sof.     

Msye Remy ti dir ki zot in les keksoz dan lanmen lapolis e ki en lanket in ouver swivan sa lensidan.

Ziska ler, personn pa ankor ganny arete.

LINKS