Parwas St. Andre i selebre 120 an

Parwas St. Andre Cascade pe sa lannen selebre son 120enm lanniverser.

Se an 1884 ki St. Andre ti ganny nonmen koman patron Cascade e pour mark sa lokazyon aktivite spirityel in deza komanse depi Zedi le 13 Me, avek lanmes.

Sanmdi le 15 Me,  pou osi annan en lanmes apartir 5er apremidi kot legliz St Andre. Aktivite pou kontinyen demen Dimans le 16 Me, avek en lanmes 9er bomaten ek en konser spirityel ki pou komans 3er apremidi kot legliz laparwas.

Bann parwasyen pou kapab partisip dan en laprosesyon Lendi le 17 Me depi lakrwa "Grand Mission" ziska kot legliz swivi  par en lanmes. En lot laprosesyon pou deroule Mardi le 18 Me apartir 5er apremidi depi kot lekol ziska ros St Antoine, e sa pou swiv par en lanmes. Merkredi le 19 Me pou annan en laprosesyon avek stati La Sainte Vierge Marie e sa pou komans kot lekol e al termin ek en lanmes kot legliz

En selebrasyon penitansyel pou ganny selebre apartir 5er apremidi Zedi le 20 Me, e Vandredi le 21 pou annan en laprosesyon flanbo swivi par en lanmes.

Kan a Sanmdi le 22, pou annan selman en lanmes ordiner 5er apremidi.

Manm piblik i ganny enformen ki gran lanmes solanel pou ganny selebre Dimans le 23 Me, 9er 30 bomaten par Monsenyer Denis Wiehe ek per Edouard. Sa lanmes spesyal  pou ganny swivi par en legzibisyon ek tonbola.

LINKS