Komite Festival Kreol in resevwar en total 120,500 roupi sorti kot plizyer lakonpannyen, en sonm ki pou ede dan lorganizasyon plizyer aktivite e anmenn plis lanpler dan 18enm edisyon sa festival.

Bann reprezantan sorti kot SMB, lakonpannyen lasirans Sacos, Labank Devlopman (DBS) e Habib Bank ti yer renouvle zot sipor pour sa festival e prezant avek Tyermenn Festival Kreol, Minis Sylvette Pool, avek zot kontribisyon pour sa lannen.

Sa bann prezantasyon ti deroul kot Konsey Nasyonal pour Lar dan prezans sekreter prensipal pour Spor e Kiltir, Msye Patrick Nanty, e lezot manm komite Festival Kreol.

SMB, ki'n fer pli gro kontribisyon finansyel, in donn 70,000 roupi e se son reprezantan Msye Claude Marimba ki ti prezant son tyek, tandis ki Sacos li in ofer 30,000 roupi, prezante par Madanm Jane Joubert. Labank Devlopman de sa par in kontribye 10,500 roupi. Se responsab sa labank Msye Roger Toussaint ki ti fer sa prezantasyon, tandis ki responsab Habib Bank, Msye Sohail Anwar li ti fer en prezantasyon 10,000 roupi.

Apard sa bann prezantasyon, komite Festival Kreol in osi pandan sa semenn resevwar 50,500 roupi atraver plizyer lezot donasyon sorti kot bann endividi ek lorganizasyon. 

Ler i ti pe remersye sa bann lakonpannyen, Minis Pool, ki osi tyermenn komite sa festival, ti dir ki i "asire ki zot pou toultan reste bann zanmi fidel Festival Kreol akoz malgre ki gouvernman i fer son bout, san kontribisyon e sipor bann akter dan sekter prive, i pa pou fasil pour fer sa festival."

I ti dir ki i swete ki komite Festival Kreol ava toultan gard en bon partenarya avek sekter prive pour ki sa festival i a gard sa menm lanpler tou le lannen.

LINKS