Lazournen Enternasyonal Mize

Anse Boileau, Roche Caiman gran venker konpetisyon kwiz

Manm lekip zenn Roche Caiman (a gos) ek lekip trwazyenm-az Anse Boileau pou zwenn dan en final televize lo SBC Zedi swar

Lekip Roche Caiman dan kategori zenn e Anse Boileau dan kategori trwazyenm-az i gran venker konpetisyon kwiz dan kad Lazournen Enternasyonal Mize.

Sa konpetisyon ti ganny organize par Mize SPDF.

Final sa konpetisyon dan ki ti annan trwa seri kestyon baze lo zedmo, proverb e lekspresyon imaze ti ganny fer Zedi kot Lakademi Militer Lil-di-Swet.

Lekip zenn Roche Caiman ki ti konpri Barbara Souffe, Debora Ernesta e Terylle Andre pou aprezan zwenn lekip trwazyenm-az Anse Boileau, ki konpri Nita Jacques e Paul Ernest, dan en final televize lo SBC Zedi le 20 Me.

Lekip Roche Caiman ti elimin lekip Anse Etoile dan final kategori zenn, tandis ki Anse Boileau ti sorti venker lo Anse Royale dan kategori trwazyenm-az. 

Antou ti annan trwa lekip zenn ek 7 lekip trwazyenm-az.

Tenm Lazournen Enternasyonal Mize sa lannen, ki pe ganny selebre ozordi, i "Mize e Leritaz Entanzib."

LINKS