Bokou in ganny akonpli atraver bann reform ki gouvernman in entrodwir pour anmenn plis lefikasite dan servis piblik me i annan ankor travay pour fer, Minis pour Ladministrasyon ek Devlopman Mendev, Madanm Noellie Alexander, in dir sa semenn.

Minis Alexander ti fer sa deklarasyon dan Lasanble Nasyonal Mardi le 15 Oktob,  letan i ti pe reponn kestyon manm elekte pour distrik Anse Royale, Onorab Barry Faure, lo bann progre reform ki'n annan dan servis piblik swivan lapel Prezidan France Albert Rene pour plis efikasite.

Dapre Minis Alexander, progre ki'n ganny fer pandan sa enn an in aparan me, i ti azoute, i ankor annan bokou pour fer pour anmenn servis piblik a en nivo satisfezan.

Ant Zanvye ek Me sa lannen, i ti dir, 770 zofisye sinyor dan gouvernman ek bann konpannyen paraetatik ti swiv en latelye de zour lo "Institutionalising a service ethos in the government of Seychelles". Sa formasyon ti asire ki tou zofisye sinyor dan gouvernman i okouran vizyon gouvernman pour servis piblik.

Minis Alexander ti osi dir ki son minister in prepar en Kod Servis ou Code of Ethics pour travayer gouvernman e ki sa in ganny diskite e ganny pwennvi manm piblik. Sa dokiman pou aprezan ganny prezante avek Konsey Minis.

En Chief Executive Forum in osi ganny etabli e sa i regroup tou sekreter prensipal ek direkter. Sa forum i zwenn tou le mwan e son rol se donn tou sef egzekitif loportinite pour aport zot kontribisyon dan bann reform e ganny zot konsantman.

Minis Alexander in dir ki son minister in osi form en nouvo divizyon – Devlopman Servis Piblik – an Zanvye sa lannen. Travay ki sa divizyon in akonpli i enkli formasyon anba Service Ethos, devlopman en kestyoner ki pou ganny servi dan sondaz nasyonal lannen prosen e revwar rol ek fonksyon Seychelles Institute of Management avek bi fer li pli byen siport progranm reform.

Minister Ladministrasyon in osi ganny led avek en eksper Kanadyen lo pli bon fason pour restriktir servis piblik isi.

Minis Alexander ti dir ki i enportan ki gouvernman i met bann striktir apropriye anplas pour donn bann servis dan en fason efikas. Aktyelman, i ti dir, plizyer restriktirasyon pe pran plas dan bann departman gouvernman.

Minis ti osi devwale ki serten travay in ganny fer an kolaborasyon avek bann sef egzekitif an sa ki konsern standar dan serten servis parey telefonn, let, randevou eksetera.

Sa standar, minis ti dir, pou asire ki en desizyon i ganny kominike avek en endivi dan en serten dele letan oubyen ki sa dimoun i ganny enformen ki son let pe ganny latansyon.

Minis Alexander ti dir ki dapre li "si nou serye avek nou progranm amelyor servis piblik, nou bezwen met serten mekanism an plas pour fer ki nou donn piblik sans dir ki i panse lo nou servis." Sa, i ti dir, i ava aret en pe lafason ki dimoun i pas zot pwennvi, setadir par dir en lot zanmi ki li an retour i rankont en lot dimoun.

I ti dir ki sak departman i devret met en plas en sistenm kot dimoun i kapab donn zot pwennvi.

LINKS