Lapolis in raporte ki en zonm, David Adonis, ti aksidantelman ganny blese avek bal dan son lipye kote drwat Lendi le 17 Novanm,  letan i ti pe debat ek en zofisye lapolis ki ti pe aret li.

Sa lensidan ti arive ver 11er diswar kot en lakaz Dolphin Court dan distrik Anse aux Pins.

Dapre lapolis, sa lensidan ti arive letan ki zot ti pe reponn lapel lasistans par en fanmiy dan sa landrwa.

Selon en manm lapolis ki ti al kot sa lakaz, letan zot ti ariv laba zot ti rankontre sa zonm ki ti'n demann lasistans akoz piti son madanm ti pe fer problenm avek li.

Lapolis i dir ki menm si keksoz ti enpe kalm letan zot ti ariv kot sa lakaz, manman sa garson ti ensiste ki zot aret son garson David e met li an detansyon.

Met sa lakaz, sa msye ki ti'n telefonnen pour lasistans, li i ti dir avek lapolis ki i pa oule David kot li.

Lapolis i azoute ki afors negosye, David ti sorti dan lakaz e ariv anba lavarang kot en sel kou i ti vin agresiv e reziste larestasyon swivan en diskisyon avek en lot zofisye lapolis.

Touzour dapre lapolis, swivan en komosyon kot lavarang David, ki ti'n tyonbo balkon, ti atrap enn sa bann zofisye lapolis dan son leren e set a sa moman ki sa zofisye ti retir son pistol e afors debat pour aras sa zofisye son pistol ki ti vir direksyon ater, en bal ti sape e David ti ganny tape dan son lipye.

Lapolis i dir ki manman David in dir ki son garson pa abitye fer sa bann keksoz parey e i ti menm azoute ki i paret ki son garson ti anba en serten lenflians kelkonk.

Lapolis in dir ki en lanket in komanse dan sa lensidan.

LINKS