Bann manm Lasanble Nasyonal parti mazoriter (SPPF) in dir ki zot pou donn zot sipor Vis-Prezidan James Michel apre ki Prezidan France Albert Rene in nonm li koman son sikseser letan i sorti o pouvwar pli tar sa lannen.

Onorab Ginette Gamatis, Mitcy Laure, Charles De Commarmond e Barry Faure ti dir ki zot konvenki ki Vis-Prezidan Michel pou kontiny sa bon travay kot Prezidan in kite.

Sa bann Onorab ti pe donn zot reaksyon Vandredi 27 Fevriye apremidi lo diskour Leta Lanasyon ki Prezidan Rene ti fer Mardi pase e dan ki i ti anonse ofisyelman ki i pe sorti o pouvwar dan de trwa mwan e ki i pou pas labar avek Vis-Prezidan Michel.

Letan i ti pe koz lo bann lakonplisman ki Seychelles in fer anba gidans Prezidan Rene, Onorab Larue ti dir ki i konvenki ki Vis-Prezidan Michel i sa zonm ki pou kapab anmenn Seychelles dan en lot faz devlopman.

Onorab Larue ti osi dir ki Leta Lanasyon pa selman vedir sitiasyon ekonomik e finansyer en pei me i osi bann lakonplisman ki ansanm koman en pep Seychelles in fer. 

Parey son bann lezot koleg manm lasanble dan parti mazoriter, Onorab Gamatis ti retras lalit  ki Prezidan Rene in fer pour ki Seychelles in ariv kot i ete ozordi e demann bann zenn pour sezi sa e viv avek.

Malgre serten problenm ekonomik Onorab Gamatis ti dir ki pep Seselwa i ankor pe ganny ledikasyon, swen lasante, lozman e bokou lenfrastriktir i ankor pe devlope. I demann tou Seselwa pour met zepol ansanm e travay pour byennet pei.

Onorab Alain Ste Ange, ki ti sel manm parti Lopozisyon ki ti koze Vandredi apremidi, ti fer resorti ki bann difikilte ekonomik ki pei pe fer fas avek in arive par sa ki in dekri koman "move gouvernans ek koripsyon".

Onorab Ste Ange ti dir ki avek lentrodiksyon GST in annan en mank komodite esansyel dan pei e ki Progranm Reform Makro-Ekonomik ki sipoze redres sitiasyon in selon li fer ki pri lavi in vin pli o ki zanmen.

Onorab Ste Ange ti osi koz lo lefe negativ ki GST in annan lo lendistri touris.

LINKS