Lapolis in aret en zonm an koneksyon avek lanmor Wilna Dine, en madanm aze 32 an, ki ti arive semenn pase Ros Copra.

Sa zonm, en rezidan Sid Mahe, ti pas ankour Mardi le 19 Out e i pe rimann an detansyon lapolis ziska ler i reaparet devan lakour Vandredi le 22 Out.

Portparol lapolis, Jean Toussaint, in dir ki letopsi in konfirmen ki Wilna Dine ti mor apre ki i ti'n ganny pike dan son likou. Ti annan de mark blesir dan son likou ler son lekor ti ganny dekouver.

Letan lapolis ti ranmas lekor Wilna Dine Mardi le 12 Out aswar lo en glasi ant bann ros pros avek lans Ros Kopra, Baie Lazare, i ti touni apard zis en souksen ki ti lo li. Serten morso son bann lezot lenz ek son sak ti osi ganny retrouve lanmenm dan zalantour.

Lapolis in osi remersye manm piblik pour zot korperasyon dan sa zafer.

******

Lensidan dife dan pick-up Pointe Cabri     Claude Monnaie i mor dan ICU

Lapolis in raporte Merkredi le 20 Out,  ki sa zonm ki ti ganny brile ler dife ti pran dan pick-up ki i ti ladan mwan pase Praslin ti mor lopital Victoria Mardi le 19 Out, bomaten.

Msye Claude Monnaie, en rezidan Konsolasyon, ti admit san konesans dan Younit Swen Entansif lopital Victoria depi le 26 mwan pase swivan brilir sibir lo son lekor apre ki pick-up ki i ti ladan ti pran dife Pointe Cabri.

Antretan lapolis in dir ki lanket dan sa lensidan pe kontinyen.

LINKS