Lapolis in raport trwa lensidan dan ki bann viktim in ganny vole apre ki zot agreser in atak zot.

Dan en premye ka, en zonm in ganny arete apre ki i ti’n atak e aras en etranze lorizin Sinwan son briefcase lo Stasyon Petrol anvil ver midi yer.

En kominike lapolis i dir ki apre ki sa zonm ti’n aras sa etranze son briefcase, i ti taye e fer direksyon Le Chantier. En zofisye tenny dife ki ti dan zanmerant letan sa vol ti arive ti tay deryer li asiste par lezot manm lafors. Sa zonm ti ganny atrape dan zanmerant Lekol Fransez, e i ansemoman an detansyon lapolis.

I pa fer premye lensidan latak e vol ki ganny raporte dan lavil Victoria pandan lazournen, e swivan sa larestasyon lapolis pe redemann manm piblik pour pli vizilan letan zot pe angaz zot dan bann tranzaksyon larzan osi byen ki letan zot pe mars avek lezot lobzer valer.

Lapolis pe demann viktim bann tel lensidan pour esey zot mye pour rikord maksimonm detay lo zot ataker akoz sa bann ataker i annan plizyer lenz lo zot e i fasil pour zot sanz zot laparans dan en pti lespas letan.

Dan en lot ka, lapolis pe fer lanket dan en latak ek vol arme ki ti arive Merkredi swar lo Stasyon Petrol Pointe Larue, kot 2 zonm arme avek gran kouto ti met 2 travayer otaz e apre sove avek 40,000 roupi. 

Dan sa lensidan in osi annan serten larestasyon ki’n ganny fer.

Dan en trwazyenm lensidan, 3 zenn-onm ti ganny arete dan rezyon nor Mahe Merkredi swar apre ki propriyete en garson ki ti’n ganny atake anvil ti ganny vwar dan zot posesyon.

LINKS