Lalyans Solidarite pour Lafanmiy (ASFF) in eksprim son senpati pour tou manm sa de fanmiy ki pe soufer swivan en bagar domestik mardi apremidi Baie Lazare kot en zenn-onm ti perdi son lavi apre ki i ti ganny blese dan son likou avek en kouto par en lot zonm.

"Nou ankor enn fwa demande ki dimoun i annan plis respe ek tolerans pour zot kanmarad. I enportan ki zot aprann ki mannyer pour kontrol zot karakter, lakoler e evite les nou antre dan  en sitiasyon kot i fini par en vyolans kot nou abiz kanmarad ziska sa degre," ASFF i dir.

"Tou dimoun i bezwen touzour mazin konsekans ki son aksyon i kapab anmennen. Fodre ki touzour nou pran an kont ki aksyon vyolans pa zanmen akseptab pour rezourd okenn sitiasyon. Alafen sa ki soufer i bann ki nou kontan (nou zanfan, paran, msye, madanm e nou zanmi)," ASFF i azoute.

ASFF in ankor enn fwa lans en lapel avek lapolis ek tou lorganizasyon ki konsernen avek vyolans pour travay ansanm e vin en lafors pli for.

"Annou tret bann ka viktim vyolans domestik o-serye e ed nou dan en kanpanny pour ki nou ava arive fer lotorite konsernen vwar nesesite pour annan en landrwa pour met bann viktim ki oblize reste dan sa sitiasyon abiziv e menm landrwa avek sa abizer," ASFF i dir.

ASFF pe demann tou dimoun pour rezourd konfli dan en fason amikal, oubyen rod lasistans ek bann diferan lorganizasyon ki konsernen.

LINKS