En pansyonner i ganny trouve mor dan son lakaz

Defen Msye Kilindo

Lapolis pe fer lanket dan sirkonstans lanmor Msye Victorin Kilindo, en zonm 84 an, apre ki i ti ganny dekouver mor dan son lakaz Dame le Roi, Baie Lazare, Lendi le 24 Me, bomaten.

Dapre Zofisye Relasyon Piblik pour Lapolis, Msye Jean Toussaint, ti ver 8.15 Lendi bomaten ki Macdonald Isaac, garson Msye Kilindo, ti enform stasyon lapolis Baie Lazare ki in trouv lekor son papa dan son lakaz Baie Lazare.

Msye Isaac, ki normalman reste Anse Boileau, ti dir ki pour en pe letan deza i ti pe reste avek son papa Baie Lazare lefe ki i en pe malad.

Msye Isaac ti dir ki Dimans swar i ti kit son papa tousel pour al Anse Boileau. Letan i ti ariv kot lakaz son papa ver 8.10 Lendi bomaten pour vin travay dan zarden, i ti vwar drol pour pa vwar son papa dan zarden.

“Labititid letan mon vini i deza pe travay dan zarden me bomaten sa pa ti leka,” Msye Isaac ti dir.

Swivan sa i ti komans kriy son papa e fer letour partou pour gete si i pa vwar li me i ti dir ki i pa ti tann reponn.

Msye Isaac ti dir ki letan i ti fer letour deryer lakaz i ti remark detrwa louvers ater e i ti kil rido ki ti permet li vwar dan son lasanm kot tou bann zafer anndan ti’n boulverse.

Alors i ti rantre anndan par sa menm lafnet kot i ti remarke ki lakaz an antye ti’n ganny fouye anba lao.

Apre plizyer fwa ki i ti kriy son papa e i pa ti tann reponn, Msye Isaac ti dir ki i ti diriz ver salon kot i ti vwar lekor son papa par kote ater. Son lanmen ek son lipye ti’n ganny anmare e ti osi annan en sifon dan son figir.

Dapre Msye Toussaint lapolis pa ankor determinen si i annan keksoz ki’n kapab ganny vole dan sa lakaz lefe ki sa lakaz ti’n ganny boulverse. 

LINKS